په راکټي بريد کې يو ترافيک پوليس ووژل شو

کندوز (پژواک ٥ غبرګولى ٩٣): په کندوز ولايت کې د راکټي بريد له امله يو ترافيک پوليس ووژل شو او درې نور ټپيان دي.

د کندوز د امنيه قوماندانۍ وياند سيدسرور حسيني پژواک خبري اژانس ته وويل، چې د ترافيکو رينجر موټر نن سهار شاوخوا شپږ نيمې بجې له لودين سيمې د کندوز ښار پر لور روان و، چې د چرخاب په سيمه کې پرې بريد وشو.

هغه زياته کړه، چې وسله والو مخالفينو دوه راکټونه پر موټر وتوغول، چې يو پر موټر لګېدلى او له امله يې يو ترافيک پوليس ووژل شو.

حسيني وايي، چې په موټر کې څلور ترافيک سپاره وو او نورو ته زيان نه دى رسېدلى.

د محمدايوب په نوم يوه ځايي استوګن وويل، د دوو درنو چاودنو غږ يې واورېد، خو کله چې له کوره ووت، پر موټر بريد شوى، يو تن په کې وژل شوى او درې نور ټپيان وو، چې هغه هم په رينجر کې روغتون ته يووړل شول.

هغه زياته کړه، چې په دغه راکټي بريدکې رينجر موټر سوځېدلى دى.

وسله والو تر اوسه په دې اړه څه نه دي ويلي.

د ويلو ده، چې تېر کال د کندوز ښار په څلورلارې کې د يوه ځانمرګي بريد له امله د ترافيکو مدير هم له څو نورو ترافيک پوليسو سره ووژل شو او يو شمېر ملکي وګړي ټپيان وو.