هلمنديان په لېوالتيا د رايې تر مرکزونو ځي

لښکرګاه (پژواک ٢٤ غبرګولى ٩٣): د هلمند چارواکي وايي چې د تېرو ټاکنو په پرتله په دويم پړاو ټاکنو کې د هلمنديانو ونډه ډېره ده.

په دغه ولايت کې د رايې ورکولو ټول مرکزونه پرانيستې دي.

د هلمند والي جنرال محمدنعيم د غبرګولي په ٢٤مه پژواک خبري اژانس ته وويل، چې په دغه ولايت کې نن سهار اوه بجې د رايې ورکولو لړۍ پيل شوې ده.

والي وويل، چې د رايې ورکولو د ټولو مرکزونو امنيت خوندي دى او په ټاکنو کې د خلکو ونډه بې سارې ده.

په تېرو ټاکنو کې د هلمند يو سل او لس زره اوسېدونکو ګډون کړى وو.

د هلمند د ټاکنو کمېسيون رييس قدرت الله نقشبندي پژواک ته وويل، چې په دغه ولايت کې د رايو ١٤٧ د رايې مرکزونه شته، چې ټول يې فعال دي.

ده وويل، چې تر اوسه په هېڅ مرکز کې تخنيکي او امنيتي ستونزه نه ده رامنځته شوې.

په ورته مهال د هلمند د امنيت امر لطف الله ګرمسېر پژواک ته وويل، چې له امنيتي ادارو سره ښه همغږي لري او د رايې ورکولو پروسه ښه روانه ده.

ګرمسېر وويل، چې پوليسو د پلان له مخې د رايې ورکونې مرکزونو امنيت نيولى او د ټاکنو په پروسه کې به هيڅ ډول لاسوهنه ونه کړي.

د حفيظ الله په نوم د لښکرګاه يوه اوسېدونکي د رايو په يوه مرکز کې د رايې له کارونې وروسته پژواک ته وويل، خوښ دى چې په ښه امنيت کې يې رايه ورکړه.

ده وويل: ((موږ خو رايه ورکړه، هيله لرو چې د دغو رايو احترام وشي.))

د ولسمشرۍ دويم پړاو ټاکنې نن په ټول هېواد کې پيل شوې دي.