د هوان د مرمۍ لګېدو له امله شپږو تنو ته مرګ ژوبله واوښته

جلال اباد(پژواک ٣٠غبرګولى٩٣): دننګرهار په مومندرې ولسوالۍ کې پر يوه کور د هوان  مرمۍ د لګېدو له امله يو ماشوم ووژل شو او پنځه  تنه ټپيان شول . 

د ننګرهار د والي وياند احمدضياء عبدالزي پژواک خبري اژانس ته وويل، چې نن سهار ٦ بجې د مومندرې ولسوالۍ د باسول په کلي کې پر يوه کور  د هوان مرمۍ لګېدلې ده.

عبدالزي وويل، د هوان دا مرمۍ د وسله وال طالبانو له لوري توغول شوې، چې په کې د يوه کور يو  ماشوم وژل شوى او د ماشومانو او مېرمنو په ګډون پنځه تنه ټپيان دي.

د والي وياند وايي، چې د پېښې ټپيان د درمنلې لپاره  روغتون ته انتقال شوي دي.

دغه راز د غني خېلو ولسوالۍ  د روغتون يوه ډاکټر د نوم نه اخيستلو په شرط پژواک ته وويل، چې له  دې پېښې ورته پنځه تنه ټپيان  ور وړل شوي؛چې د يوه روغتيايي حالت د اندېښنې وړ دى.

ده وويل، چې په ټپيانو کې ماشومان  هم شامل دي.

د دولت وسله والو مخالفينو تراوسه پورې په دې اړه څه نه دي ويلي .