د هلمند د هندواڼو او خټکيو حاصلات ډېر شوي

لښکرګاه (پژواک ۱۹ چنګاښ ۹۳): د هلمند د کرنې رياست وايي چې سږ کال په دغه ولایت کې د هندواڼو او خټکیو حاصلات ډېر شوي دي.

د دغه ولایت دکرنې سرپرست ريیس روح الله روان پژواک خبري اژانس ته وویل چې سږ کال په هلمند کې پالېزونه چنجيو نه دي وهلي او د نورو کلونو په پرتله هوا هم مناسبه وه.

نوموړي زیاته کړه، چې د تخمونو اصلاح کول، د کرنې رياست له لوري د نمايشي پالېزونو جوړول او د کروندګر د تجربو زياتېدل  د حاصلاتو د ډېرېدو لامل دي.

د کرنې سرپرست وويل، چې د دغه ولايت هندواڼې او خټکي پر هلمند سربېره نورو ولايتونو ته هم لېږدول کېږي.

ده ونه وويل، چې روان کال د هلمند ولايت پر څومره ځکمه هندواڼې او خټکي کرل شوي وو او د تېرو په پرتله يې حاصلات څومره ډېر دي.

ګلاجان هغه کروندګر دى چې له ناوې ولسوالۍ يې هندواڼې او ختکي لښکرګاه ته د پلور لپاره راوړي دي.

دى وايي، خوښ  دى چې د تېر کال په پرتله يې حاصل ښه و او ډېرې پيسې به وګټي.