خېوې کې د نجونو د دوه لېسو لپاره ودانۍ جوړيږي

جلال اباد ( پژواک  ١٠ وږى ٩٣) : د ننګرهار په خېوې ولسوالۍ کې د نجونو د دوه لېسو لپاره  د ودانيو په جوړېدو سره به د زده کوونکو لپاره ښه درسي فضا رامنځ ته شي.

د ننګرهار دپوهنې رييس پوهندوى الله داد اسماعليزي د دې ودانيو د بنسټ ډبرې د اېښودو په مراسمو کې وويل، چې يادې  ودانۍ د جاپان هېواد په مالي مرسته جوړېږي.

نوموړي وويل، چې يادې دوه ودانۍ د خېوې ولسوالۍ د قلعه ټک او توکل بابا دنجونو د دوو لېسو  لپاره جوړيږي ، چې هره يوه به يې اته درسي او څلور اداري خونې ولري.

دى زياتوي، چې د يادو ودانيو چارې به د يوه کال په موده کې بشپړې  شي.

ده زياته کړه: (( د جاپان هېواد په مالي مرسته به د سره رود او بهسودو ولسواليو د پوهنې په برخه کې هم ۱۴ پروژې په نږدې راتلونکي کې پلې شي.))

د ننګرهار د ولايتي شورا غړي ضابط امير محمد بيا د يادو لېسو لپاره د ودانيو پر جوړولو خوښي وښوده  او زياته يې کړه ، چې ولسونه بايد د دا ډول پروژو ساتنه وکړي.

نوموړى وايي ، چې په سيمه کې بايد هغه خنډونه هم له منځه يوسي کوم چې ديوشمېر بيارغنيزو پروژو پر وړاندې رامنځته کيږي.

ده زياته کړه: (( اوس زموږ سلګونه خويندې په ازاده هوا کې درس وايي، خو که دا ودانۍ جوړې شي، نو مشکل به ختم شي.))

دامهال په ننګرهار ولايت کې ۸۸۰ ښوونځي شته ، چې تر نيمايي ډېر يې ودانۍ لري، چې د چارواکو په وينا، يو شمېر نورو ته  به هم ودانۍ جوړې کړي.