حامدکرزي د دواړو نوماندانو ترمنځ له هر ډول وروستۍ هوکړې ملاتړ اعلان کړ

 کابل(پژواک ١٢ وږى ٩٣): د ولسمشرۍ دواړو نوماندانو اشرف غني احمدزي او عبدالله عبدالله د ملي يووالي حکومت د جوړېدو د هڅو پر دوام نن له ولسمشر کرزي سره ليدنه او خبرې وکړې.

د ولسمشرۍ مطبوعاتي دفتر وايي، چې  حامدکرزي په هغه ليدنه کې چې نن سهار يې له عبدالله او احمدزي سره درلوده، دواړه نوماندان يې وهڅول، چې ډېر ژر دې يوې هوکړې ته ورسېږي.

په  خبرپاڼه کې راغلي، چې حامد کرزي نن له غرمې مخکې د خپلو دوو مرستيالانو په شتون کې له اشرف غني احمدزي او عبدالله عبدالله سره په ارګ کې وکتل او د ټاکنيزې پروسې د وروستيو پرمختګونو په اړه يې ورسره خبرې وکړې.

په خبرپاڼه کې راغلي، چې ولسمشر کرزي د دواړو نوماندانو ترمنځ د ټاکنيزې پروسې د پاى ته رسولو په اړه د دواړو نوماندانو له خبرو ملاتړ کړى او هيله يې څرګنده کړې، چې هغوى ډېر ژر يوې پايلې ته ورسېږي ، څو ملت له انتظار او اوسني ناڅرګند وضعيت څخه راووځي.

ولسمشر وويل:(( دى له هر ډول هغې وروستۍ هوکړې هر کلى کوي، چې دواړه اړخونه سره پرې جوړ شي .))