اسعداباد (پژواک ٢٢ وږى ٩٣): لسګونو وسله والو طالبانو په کونړ ولايت کې پر ١٢ امنيتي پوستو بريدونه کړي ، چې له امله يې دواړو لورو ته مرګ ژوبله اوښتې ده.
د کونړ والي شجاع الملک جلاله د وږي په ٢٢مه پژواک خبري اژانس ته وويل چې وسله والو طالبانو نن سهار څلور نيمې بجې د ماڼوګي او چپې درې ولسواليو پر دوولسو امنيتي پوستو بريدونه کړي وو.
هغه زياته کړه چې وسله وال مخالفين د ملي اردو له ځوابي بريدونو سره مخ شول چې د رامنځته شوې جګړې په ترڅ کې ١٥ وسله وال ووژل شول او ١٧ نور ژوبل شوي دي.
والي وويل چې په دې جګړه کې درې د ملي اردو سرتېري هم وژل شوي او څلور نور ټپيان دي.
د جلاله په وينا، په وژل شوو کې د حليمي په نوم د وسله والو يو مشهور قوماندان هم شامل دى.
دى وايي چې په دغو بريدونو کې ٢٥٠ وسله والو مخالفينو برخه اخيستې وه او د اوو تنو جسدونه يې هم په سيمه کې پاتې دي.
طالب وياند ذبيح الله مجاهد بيا وايي چې په دې جګړه کې ٩ دولتي سرتېري وژل شوي او ٨ نور ټپيان دي.
بلخوا د ملي دفاع وزارت له خوا په يوه خپره شوې خبرپاڼه کې راغلي چې د افغانستان په بېلابېلو سيمو کې د ماين چاودنو له مله د ملي اردو درې سرتېري وژل شوي.
