د هلمند بست تصدۍ سږکال درې زره ټنه پنبه له کرندګرو پيري

لښکرګاه (پژواک ۸ تله ۹۳) : د هلمند د بست تصدۍ مسوولين وايي، چې له کروندګرو څخه  يې د سږکال راټولې شوې پنبې د پير کمپاين پيل کړى، چې په ترڅ کې به يې درې زره ټنه دانه داره  پنبه وپيري.

ددې تصدۍ رييس حاجي شرين خان د پنبې د تحويلۍ د پيل پرمهال پژواک خبري اژانس ته وويل ، چې که څه هم سږکال کروندګر د پير لپاره  اوه زره ټنه پنبه  لري، خو دوی يواځې د درې  زره ټنه د پير بوديجه په لاس کې لري.

هغه زياته کړه، چې له نورو کلونو سره يې د پنبې د پېر توپير دادی ، چې کروندګرو ته نغدې پيسې ورکوي او تر تحويلۍ وروسته دکروندګرو د تشويق لپاره  بيا ځينې توليدات وړيا ورکول کېږي.

شيرين خان وايي چې د هر يو کيلو ګرامو پنبې بيه يې  ۴۰ افغانۍ ټاکلې ده او دغه بيه ازاد بازار ته  په کتلو سره ټاکل شوې ده.

دده  په وينا ، دوی له مرکزي دولت څخه غوښتنه کړې، چې بست تصدۍ ته د پنبې د پېرلو لپاره ډېره بوديجه ورکړي او پخوانۍ د فوډ زون پروګرام هم ددوی له خوا پلى  کړي او ترڅنګ يې د يادې فابريکې ماشينونه نوي او يا هم  ورته ترميم کړي.

بله خوا کروندګر وايي چې پنبه د کوکنارو بديل کېدای شي ،چې دولت ورته  پوره پاملرنه وکړي او بيه يې لوړه وټاکي، ترڅو دغه کښت پراختيا پيدا کړي .

د نادعلي ولسوالۍ د ۳۱ غربي سيمې يو تن کروندګر حاجي  خدای نظر  پژواک اژانس ته وويل، چې د پنبې اوسنۍ بيه د کروند ګرو لګښتونه نه شي پوره کولی.

هغه د پنبې د تصدۍ له مسوولينو غوښتنه کوي، چې دوی ته د پخوا په څېر وړيا کيمياوي سرې او نور کرنيز محصولات ورکړي.

دده په وينا، که  چېرې دولت د پنبې کروندګرو ته  پاملرنه وکړي، له يوې خوا به د خلکو اقتصاد په پښو ودريږي او له بلې خوا به د کوکنارو د کر کيلې مخه  هم ونيول شي.

د مير اغا په نامه د ناوې ولسوالۍ يوه کروندګر پژواک ته وويل ، چې پخوا به کروندګرو او د هلمند بست فابريکې ګټې سره شريکې وې، ټول کال به يې وړيا توکي کروندګرو ته ورکول، خو اوس  د يوه  دوکاندار په څېر توکي پيرل او پلورلو سره د دوی ترمنځ معامله  خلاصه  شي.

د هلمند د بست تصدۍ فابريکه  شاوخوا پنځه لسيزې وړاندې جوړ شوې ده ، چې هغه وخت يې د مسوولينو په وينا، هرکال تر ۳۰ زره  ټنه  دانه لروونکې پنبه پيرله.