د ننګرهار خوګياڼو کې پنځه ملکي وګړي ووژل شول

جلال اباد ( پژواک، ٢ لړم  ٩٣ ) : د ننګرهار ولايت په خوګياڼو ولسوالۍ کې د ملکي وګړو پر يوه موټر د وسله وال بريد په ترڅ کې د ماشومانو په ګډون پنځه تنه وژل شوي او دوه  نور ټپيان دي.

د ننګرهار د والي وياند احمد ضياء عبدالزي پژواک خبري اژانس ته وويل :” دا پېښه نن سهار شپږ بجې د خوګياڼو ولسوالۍ اړونده د بايزيد خېلو سيمه کې رامنځ ته شوې، چې په وژل شويو کسانو کې ماشومان هم شامل دي. “

د والي وياند وژل شوي کسان، ټول عام وګړي وبلل او زياته يې کړه چې ناپېژاندو وسله والو   ددغو کسانو پر موټر ډزې کړې دي .

همدارنګه د خوګياڼو ولسوالۍ د ملکي روغتون امر ډاکټر نور اغا پژواک ته وويل چې درې وژل شوي ماشومان  او دوه ټپيان ددوی روغتون ته ور وړل شوي دي.

بله خوا د يادې سيمي اوسېدونکی رياض احمد وايي چې دا کسان نن د ولسوالۍ په بازار کې د جمعې د ورځې جوړې شوې مېلې  ته روان وو، چې ناپېژاندو کسانو پرې ډزې وکړې.

د پېښې مسووليت تر دې دمه چا پر غاړه نه دی اخيستی .