جلال اباد (پژواک، ٢٨ لړم ٩٣): د ننګرهار ولايت د هسکې مېنې ولسوالۍ ټول هغه ښوونځي چې د وسله والو مخالفينو له خوا تړل شوي وو، بېرته د زده کوونکو پر مخ پرانيستل شوي دي.
له تېرې اوونۍ راهيسې د هسکې مېنې ولسوالۍ د مريز، ياغي بند، ګورګورۍ او يو شمېر نورو سيمو شاوخوا ٢٣ ښوونځي او يو دارالمعلمين د وسله والو له لوري تړل شوي وو.
وسله والو له حکومته غوښتي وو چې د دوى نيول شوى قوماندان عبدالخالق بايد پرېږدي، د ګورګورۍ کلينيک ته دې درمل ولېږدول شي او هغه لار چې وسله والو پرې تګ راتګ کاوه او اوس د امنيتي پوستې په وسيله تړل شوې، بېرته پرانيستل شي.
د ننګرهار د پوهنې رياست مطبوعاتي مسوول محمداصف شينواري د لړم په ٢٨مه پژواک خبري اژانس ته وويل چې د ننګرهار ولايت مقام، پوهنې رياست او قومي مشرانو په هلو ځلو سره ياد تړلي ښوونځي نن بېرته د زده کوونکو پر مخ پرانيستل شول.
هغه زياته کړه، چې ښوونځي پرته له کومې معاملې پرانيستل شوي او دوه ورځې وروسته به کلنۍ ازموينې هم پيل شي.
د سيمې اوسېدونکى رباني شينوارى وايي چې ولايتي ادارې د وسله والو مخالفينو يو شمېر غوښتنې منلې دي.
دى وايي چې وسله والو هغه غوښتنه چې د ګورګورۍ کلينيک ته دې د جراحۍ درمل ولېږدول شي منل شوې ده.
نوموړي د نورو غوښتنو په اړه څه ونه ويل.
د يادې ولسوالۍ يو ښوونکى نجيب الله هم ورته خبره کوي او وايي چې د وسله والو ځيني غوښتنې منل شوې دي.
نوموړي وويل چې دوى نن له سهاره ښوونځيو ته راغلي او ښوونځي په بشپړ ډول خلاص شوي دي.
د ننګرهار د والي وياند احمدضياء عبدالزي هم تاييد کړې چې ښوونځي خلاص شوي خو نوموړي د وسله والو د غوښتنو په اړه څه نه دي ويلي.
وسله والو تر اوسه په رسمي توګه د دغو ښوونځيو د تړل کېدو په اړه څه نه دي ويلي، خو وړمه ورځ د ننګرهار امنيتي مسوولينو ويلي وو، هغه وسله وال طالب قوماندان په هوايي بريد کې وژل شوى چې ياد ښوونځي يې تړلي وو.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن