اسعداباد (پژواک، ٢٩ لړم ٩٣): د کونړ ولايت پر مرکز اسعداباد ښار د وسله والو له خوا د هاوان په بريد کې يو زده کوونکى وژل شوى او د دوو زده کوونکو په ګډون ٦ تنه نور ټپيان شوي دي.
د کونړ امنيه قوماندان مل پاسوال عبدالحبيب سيدخېل د لړم په ٢٩مه پژواک خبري اژانس ته وويل چې دغه بريد نن سهار شاوخوا اته بجې شوى دى.
هغه زياته کړه چې د وسله والو مخالفينو له خوا توغول شوې د هاوان مرمۍ د اسعداباد ښار اړوند د يارګل په سيمه کې پر پاخه سړک لګېدلې ده.
سيدخېل وايي چې په دې پېښه کې شپږ ملکي وګړي ټپيان شوي چې د درملنې لپاره ملکي روغتون ته لېږدول شوي دي.
د کونړ د عامې روغتيا رييس ډاکتر فضلي پژواک اژانس ته وويل چې دوى ته د پېښې له ځاىه اووه ټپيان ور وړل شوي، چې يو يې په روغتون ک ساه ورکړه.
دى وايي چې نور ټپيان د ننګرهار روغتون ته لېږدول شوي دي.
د کونړ د پوهنې رييس سيد جمال الدين حسني وايي چې د دې پېښې په ټپيانو کې د اسعداباد دارالحفاظ درې زده کوونکي او د پوهنتون يو محصل هم شامل دي.
هغه زياته کړه چې يوه زده کوونکي په روغتون کې د سختو ټپونو له امله ساه ورکړې ده.
وسله والوطالبانو تر اوسه په دې اړه تر څه نه دي ويلي.
