لښکرګاه (پژواک ۱۷ ليندۍ ۹۳): د هلمند چارواکي وايي، په نادعلي ولسوالۍ کې د فوټبال لوبې پرمهال د ماين په چاودنه کې درې پوليس ټپيان شوي دي.
د نادعلي سرپرست ولسوال فصيح الله، پژواک خبري اژانس ته وويل، چې نن ماښام څه کم شپږ بجې د ولسوالۍ د مرکز په يوه لوبغالي کې د مرکزي لېسې او يارانو لوبډلو ترمنځ د فوټبال سيالۍ په وروستيو کې، يوه ماين ته د ريموټ په وسيله چاودنه ورکړل شوې ده.
هغه زياته کړه، په دې پېښه کې دوه سيمه ييز پوليس او يو ملي پوليس، چې د لوبې ننداره يې کوله، ټپيان شوي دي.
د ده په وينا، لوبغاړو او نورو عامو کسانو ته په دې پېښه کې زيان نه دی اوښتی.
د نادعلي د ټولنيزې شورا يوه غړي غياث الدين هم ياده چاودنه تاييد کړې ده، خو د مرګ ژوبلې په اړه يې معلومات نه لرل.
بايد وويل شي، چې د روانې ليندۍ مياشتې په دويمه، د پکتيکا په يحيی خېلو ولسوالۍ کې د واليبال سيالۍ پرمهال ځانمرګی بريد وشو، چې په ترڅ کې يې لسګونو کسانو ته مرګ ژوبله واوښته.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن