غزني (پژواک ۲۴ ليندۍ ۹۳) : چارواکي وايي ، وسله والو طالبانو د ملي اردو هغه پنځه سرتېري وژلي ، چې څلور ورځې مخکې يې د غزني په قره باغ ولسوالۍ کې تښتولي وو.
وسله والو طالبانو دا سرتېري د ليندۍ په٢٠ مه د کندهار- کابل پر لاره د غزني د قره باغ ولسوالۍ د سپين بند په سيمه کې له موټره ښکته کړي او تښتولي وو.
هغه مهال چارواکو ويل، چې د دغو سرتېرو د پيدا کولو لپاره يې عمليات پيل کړي، خو نن (ليندۍ ٢٤مه ) ولايتي ادارې تاييده کړه چې د دې سرتېرو مړي يې موندلي دي.
په غزني کې د ۲۰۳ تندر قول اردو د درېيمې لوا وياند جګړن نظيف الله سلطاني پژواک خبري اژانس ته وويل ، چې د دې سرتېرو مړي يې د ”ملوک” په سيمه کې پيدا کړي دي.
هغه وويل، چې دې سرتېرو په کندهار ولايت کې دنده درلوده او کور ته د راتګ پر مهال وسله والو طالبانو له شخصي موټره ښکته کړي وو.
د غزني د والي وياند شفيق ننګ پژواک اژانس ته وويل، چې دا سرتېري څلور ورځې مخکې تښتول شوي وو او تېره شپه وژل شوي دي.
په قره باغ ولسوالۍ کې د سيمه ييزو پوليسو قوماندان محمداعظم پژواک ته وويل،چې د دغو سرتېرو د پيدا کولو په موخه يې پلټنې وکړې، خو وسله والو نامعلوم ځاى ته انتقال کړي وو.
د ملوک د سيمې يوه اوسېدونکي روح الله پژواک وويل، چې وسله والو طالبانو نن شپه د پنځو سرتېرو مړي د دوى د جومات مخې ته اچولي وو.
روح الله زياتوي، چې د سيمې خلکو امنيتي ځواکونو ته خبر ورکړ او هغوى د وژل شوو سرتېرو جسدونه انتقال کړل.
د غزني د ولايتي روغتون رييس بازمحمد همت پژواک ته تاييد کړه، چې نن سهار له دغه پېښې د ملي اردو د درې سرتېرو مړي ور وړل شوي، چې پر بدن يې د مرميو نښې نښانې دي.
وسله والو طالبانو تراوسه په دې تړاو رسنيو ته څه نه دي ويلي.
