جلال اباد ( پژواک، ٣٠ ليندۍ ٩٣ ) : د جلال اباد – تورخم پر لويه لاره په دوو غبرګو چاودنو کې پنځو تنو ته مرګ ژوبله اوښتې ده.
د ملي دفاع وزارت له خوا دليندۍ په ٣٠مه، پژواک خبري اژانس ته په يوه رالېږل شوې خبرپاڼه کې راغلي چې دا چاودنه نن سهار په شاوخوا نهو بجو د جلال اباد ښار ختيځ لوري ته د پخوانۍ قول اردو مخې ته شوې ده.
سرچينه زياتوي ، په دې چاودنه کې چې د ملي اردو پر يوه رېنجر موټر شوې ده، يو افسر وژل شوى او درې نور سرتېري ټپيان شوي دي.
د ننګرهار د والي وياند احمد ضياء عبدالزى وايي چې د ملي اردو پر رېنجر تر چاودنې نيم ساعت وروسته په همدې سيمه کې پر يوه ملکي موټر چاودنه شوې ده.
هغه زياته کړه، دا چاودنه د چسپکي ماين له امله شوې، چې له امله يې يواځې موټر چلوونکى وژل شوى دى.
د يوه بل خبر له مخې، تېره شپه ددې ولايت د بهسودو ولسوالۍ د بنغرو په سيمه کې د يوه قومي مشر د کور مخې ته چاودنه شوې ده.
د بهسودو ولسوالۍ يو تن قومي مشر ملک ولايت خان پژواک اژانس ته وويل چې چاودنه د ملک ډاکټر ګلجان د کور په دروازه کې شوې ده.
هغه زياته کړه، چې د چاودنې له امله د هغه د کور دروازه، ښيښې ماتې او ځينې نورې برخې يې ويجاړې شوې دي.
ډاکټر ګلجان پژواک اژانس ته وويل چې دى له چا سره دښمني نه لري او تل يې د خلکو د ستونزو د هوارولو لپاره هلې ځلې کړې دي.
نوموړي له امنيتي مسوولينو وغوښتل چې ددې پېښې جدي څېړنه وکړي.
د والي وياند عبدالزي چاودنه تاييد کړه، خو په دې اړه يې نور معلومات نه درلودل.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن