جلال اباد ښار کې ١٢ هټۍ وال د وسلو پلورلو په تور ونيول شول

^{جلال اباد (پژواک ٢ سلواغه  ٩٣):  چارواکي وايي چې په ننګرهار ولايت کې يې ١٢ هټۍ وال په ناقانونه  ډول د وسلو پلورلو په تور نيولي دي.}

د دې ولايت امنيه قوماندان مل پاسوال فضل احمد شېرزاد د سلواغې په ٢مه پژواک خبري اژانس ته وويل چې پوليسو نن د جلال اباد ښار د لومړۍ حوزه  اړونده ساحه کې چاڼيز عمليات وکړل.

شېرزاد وايي، د دې عملياتو په ترڅ کې له څو هټيو چې وسلې يې پلورلې ٢١ تومانچې او ١٣٠ چرييز ټوپک  له ١٢ پلورونکو سره نيولي دي.

نوموړي وويل: ((‌ډېرى مجرمينو به د ښار له يادو هټيو وسلې ترلاسه کولې او بيا يې پرې  ترهګريز اعمال ترسره کول.))

د شېرزاد په خبره، پوليس به چاته اجازه ور نه کړي چې په ناقانونه ډول وسلې وپلوري او له سرغړونکو سره به قانوني چلند وکړي.