تخار کې يوې ١٤ کلنې نجلۍ ځان وژنه کړې

تالقان ، ميدان ښار (پژواک، ٧ کب ٩٣): په تخار ولايت کې يوې ١٤کلنې نجلۍ ځان وژلى، بلخوا په ميدان وردګو کې يو تنکى ځوان وژل شوى دى.

د تخار د والي وياند سنت الله تيمور نن پژواک خبري اژانس ته وويل  چې د تالقانو ښار د سرای سنګ په سيمه کې يوې ١٤کلنې نجلۍ زهر خوړلي او مړه شوې ده.

د هغه په وينا،  دغه نجلۍ خورشيد نومېده چې د زهرو تر خوړو وروسته يې په روغتون کې ساه ورکړه .

د تخار د ولايتي روغتون مشر ډاکټر کرام الدين هم ياده پېښه تاييد کړې ده.

د يادونې ده، تر اوسه د يادې پېښې اصلې لامل نه دى معلوم شوى.

دغه راز د يو بل خبر له مخې، د ميدان وردګو په چک ولسوالۍ کې يو لس کلن تنکى ځوان د خپل  ترور  د زوى پر ډزو  وژل شوى دى.

د ميدان وردګو ولايت له مطبوعاتي دفتره په خپره شوې خبرپاڼه کې راغلي چې دغه تنکى ځوان فتاح نومېده او د امبوخاک سيمې اوسېدونکى و.

په خبرپاڼه کې راغلي: ((دغه پېښه هغه مهال رامنځته شوه، کله چې د محمد هارون په نوم  يو لس کلن تنکی ځوان د خپل ۱۳ کلن د ترور زوی فتاح کره تللى  و چې د نوموړي له لوري پرې ډزې شوي او  وژل شوى دى.))

د سرچيني په حواله، امنيتي ځواکونه له پېښې وروسته سيمې ته رسېدلي او د پېښې په اړه  يې څېړنې پيل کړې دي.

په خبرپاڼه کې راغلي چې د ميدان وردګو سرپرست والي عبدالمجيد خوږياڼى ياده پېښه خوا شينوونکي بولي او د وژل شوي تن کورنۍ ته د جميل صبر غوښتنه کوي.