پل علم کې د ملي اردو څلورو سرتېرو ته مرګ ژوبله اوښتې

پل علم ( پژواک، ١٧ غويى ٩٤ ) : د لوګر ولايت په مرکز پل علم ښار کې ديوې چاودنې له امله د ملي اردو څلورو سرتېرو ته مرګ ژوبله اوښتې ده.

ددې ولايت د سرپرست والي وياند دين محمد دروېش د غويي په ١٧مه، پژواک خبري اژانس ته وويل چې دا چاودنه تېره ورځ ماښام د ولايت د مرکز پل علم اړونده د شېروازه په سيمه کې شوې ده.

هغه زياته کړه، چې د ملي اردو د کومانډو قطعې ځواکونو يوې پوستې ته ډوډۍ وړله، چې په لاره کې پرې چاودنه وشوه.

د نوموړي په وينا، په دې چاودنه کې ديوه افسر په ګډون دوه سرتېري وژل شوي او دوه نور  ټپيان دي.

د حسيب الله په نامه د پېښې يوه عيني شاهد پژواک ته وويل چې چاودنه د ولايت د امنيه قوماندانۍ په درې کيلو مترۍ کې د بره کي برک ولسوالۍ پر لاره شوې ده.

دى وايي چې د ولايت په مرکز کې نا امنۍ خلک اندېښمن کړي دي.

وسله والو طالبانو ددې چاودنې مسووليت  منلى دى.