پل علم (پژواک، ١١ وږى ٩٤): د لوګر په ازرې ولسوالۍ کې د ماين چاودنې د عامه نظم دوه پوليس وژلي او درى نور يې ټپيان کړي دي.
د لوګر د والي وياند سليم صالح د وږي په ١١مه پژواک خبري اژانس ته وويل چې نن له غرمې وروسته شاوخوا درى بجې د ازرې په ولسوالۍ کې د عام نظم د ګزمې پر موټر چاودنه شوې ده.
هغه وايي چې په دې چاودنه کې د عامه نظم دوه پوليس وژل شوي او درې نور ټپيان دي.
د صالح په وينا، د ټپيانو روغتيايي حالات هم نازک و او درملنې په موخه روغتون ته لېږدل شوي دي.
د لوګر د امنيې قوماندانۍ د امنيت امر سمونيار قاري محمد ورا هم پژواک ته ياده پېښه تاييد کړه او ويې ويل چې دغه چاودنه د ولسوالۍ ودانۍ ته نږدې د عامه نظم د ګزمې پر موټر شوې ده.
ورا وايي چې دغه ماين د وسله والو طالبانو له لوري ځاى پر ځاى شو و.
خو وسله والو طالبانو تر اوسه په دې اړه څه نه دي ويلي.
login or register a new account.
