په زابل کې د يوې پوستې پنځه پوليس په مرموز ډول وژل شوي

کلات (پژواک، ١٦ وږى ٩٤): چارواکي  وايي چې په زابل ولايت کې پنځه پوليس په مرموز ډول وژل شوي دي.

دا پېښه  د وږي په ١٦مه سهار شاوخوا شپږ بجې د زابل په شاجوى ولسوالۍ کې رامنځته شوې ده.

د شاه جوى ولسوال وزيرمحمد جوادي پژواک خبري اژانس ته وويل چې د ولسوالۍ د کجيرخېلو په سيمه کې د پوليسو د يوې پوستې څلور پوليس وژل شوي او يو شمېر نور ورک دي.

هغه زياته کړه چې  د پېښې د پلټنې لپاره يې يادې سيمې ته يو پلاوى لېږلى، څو د پوليسو د وژل کېدو څرنګوالى معلوم کړي.

خو د دغه ولايت يوې بلې امنيتي سرچينې پژواک ته وويل چې په دې پېښه کې پنځه پوليس وژل شوي او دوه نور ورک دي.

د سرچينې د معلوماتو له مخې، ډېر ګومان کېږي چې نادرک شوو پوليسو د خپلو ملګرو په وژلو کې لاس درلود او له وسلو سره تښتېدلي دي.

وسله والو مخالفينو تر اوسه په دې اړه څه نه دي ويلي.

د يادونې ده، په دې وروستيو کې په  سوېلي ولايتونو کې د امنيتي ځواکونو او  په ځانګړې توګه د پوليسو د مرموزو وژنو پېښې زياتې شوې دي.

له تېرې يوې مياشتې راهيسې يواځې په هلمند ولايت کې  په دې ډول وژنو کې تر ١٥ ډېر پوليس وژل شوي دي.