هند د زړه په ناروغۍ اخته ماشومانو درملنې لپاره پنځه ميليونه ډالره مرسته وکړه

کابل ( پژواک،٢١ وږي ٩٤):  افغاني سره مياشت ټولنه وايي چې د هندوستان له لوري د پنځو ميليونو ډالرو په مرسته  ټاکل شوې ده چې په پنځو راتلونکو کلونو کې د زړه په ناروغۍ د اخته  ٤٠٠٠ ماشومانو درملنه وشي.

د پنځو ميليونو ډالرو مرستې تړون نن د افغاني سرې مياشتې ټولنې مشرې او په کابل کې د هندوستان سفير تر منځ لاسليک شو.

د دې ټولنې مشرې فاطمې ګيلاني د دغه تړون له لاسليک وروسته وويل چې  د زړه سوري ناروغۍ نه يواځې په افغانستان کې په يوه ستونزه بدله شوې، بلکې ډېرى اسيايي هېوادونه پرې اخته دي.

نوموړې د دې ناروغۍ  د درملنې په برخه کې د هندوستان له مرستې مننه وکړه.

مېرمن ګيلاني د زړه سوري په ناروغۍ د اخته ماشومانو درملنې په برخه کې د دولت له همکارۍ مننه وکړه او ويې ويل چې نه يواځې د هندوستان مرسته يې ترلاسه کړه، بلکې روان کال کې يې د بيت الله شريف هر زيارت کوونکى وهڅاوه څو له دغه صندوق سره زر افغانۍ مرسته وکړي.

نوموړې د دغه مطلب په څرګندولو سره چې په هندوستان کې د زړه سوري په ناروغۍ اخته يو ماشوم درملنه ٣٠٠٠ امريکايي ډالر لګښت ته اړتيا لري زياته يې کړه؛ چې ځينو پېچلو حالتونو کې  له ٤ تر ١٢ زرو ډالرو لګښت ته اړتيا شته، په دې صورت کې له څه باندې دريو زرو ډالرو څخه زيات لګښت افغاني سره مياشت ټولنه ورکوي.

ګيلاني زياته کړه: "دا اضافي لګښت به د حج ادا کوونکو له مرستې څخه ورکړو."

د دې تر څنګ، سرچينې له کام اير او الکوزي شرکتونو څخه چې د الوتکو د ټکټونو په برخه کې د ماشومانو لېږد او رالېږد لپاره مرسته کړې مننه وکړه.

کابل کې د هندوستان سفير امرسنها د خوښۍ په څرګندولو سره چې هېواد يې توانېدلى له افغان ماشومانو سره مرسته وکړي، وويل  چې د زړه ډاکټرانو لپاره په افغانستان کې روزنيز پروګرامونه په پام کې نيول شوي، څو افغانستان کې  د زړه سوري ناروغۍ اسانه ناروغۍ د فرانسويانو روغتون کې  تداوي شي.

د هندوستان پنځه ميليونو ډالرو  مرستې سره، داسې حال کې د زړه په ناروغۍ اخته زرګونو ماشومانو لپاره د درملنې موکه برابره شوې ده چې د دې ادارې په وينا، د زړه په ناروغۍ اخته ډېرى ماشومان د هلمند، خوست، ننګرهار او بدخشان ولايتونو اوسېدونکي دي.

د زړه سوري په ناروغۍ د اخته ماشومانو درملنې پروګرام څلور کاله وړاندې پيل شوى چې په دې موده کې څه باندې ٨ زره ماشومان ثبت شوي دي چې نږدې ٤  زره يې تداوي شوي او پاتې ٤ زره يې د درملنې په تمه دي.

login or register a new account.