نا امنيو د کجکي د درېيم توربين د نصبولو مخه نيولې

لښکرګاه (پژواک، ۲۷ وږی ۹۴): د سوېلي زون د برېښنا عمومي مشر وايي چې ناامنۍ د برېښنا پر سيستم ځکه اغېز نه شي کولاى چې په دې برخه کې طالبان هم مرستې کوي.

څو ورځې وړاندې د هلمند ولايت ځينو چارواکو اندېښنه ښودلې وه، که چېرې طالبان د کجکي ولسوالۍ د تنګي سيمه ونيسي نو د برېښنا په سيستم کې به ستونزې پيدا شي.

له تېرو څلورو ورځو راهيسې د کجکي ولسوالۍ په تنګي سيمه کې د امنيتي ځواکونو او وسله والو طالبانو تر منځ جګړه روانه ده.

د کجکي د برېښنا بند په تنګي سيمه کې موقعيت لري.

خو د سوېلي زون د برېښنا عمومي مشر سيدرسول د وږي په ٢٧مه پژواک خبري اژانس ته د يوې ځانګړې مرکې په ترڅ کې وويل چې په دې سيمه کې نا امني د برېښنا پر سيستم هېڅ ډول منفي اغېز نه شي کولاى.

هغه زياته کړه: ((که چېرې طالبان ونه غواړي یوه ورځ هم دغو ښارونو ته برېښنا نه شي رسېدلی؛ ځکه همدا اوس مهال موږ د طالبانو په سیمو کې پرې شوي مزي جوړوو او په دغه کار کې تر ډېره د قوم مشرانو مرسته کړې ده.))

سيد رسول وايي: ((په دې وروستیو کې چې کله په کجکي ولسوالۍ کې جګړه ګرمه شوه، نو د هغه درېیم توربین د نصب د کمپنۍ بهرني ملکي مسوولین، له احتمالي خطره د خونديتوب په موخه کندهار ښار ته تللي؛ ځکه هغوی هېڅ ډول خطر نه قبلوي.))

نوموړي وویل، کله چې په سیمه کې د جګړې ستونزې هوارې شي، دغه بهرني مسلکي مامورین به بېرته کجکي ته ولاړ شي او خپل کارونه به پیل کړي.

د ده په وینا، د درېیم توربین د نصب بهرني مسوولین هم پوهېږي چې د طالبانو موخه د برېښنا فابریکه او دوی نه دي خو له جګړې وېره لري او نه غواړي په نا امنه سیمه کې پاتې شي.

د هغه د معلوماتو له مخې، د کجکي د برېښنا بند د درېيم توربين د نصب چارې به د يو کال په موده کې بشپړې شي.

دى وايي چې د درېيم توربين په فعالېدو سره به په دې سيمه کې د برېښنا د توليد کچه ٥١ ميګاواټو ته لوړه شي.

هغه زياته کړه: ((طالبانو له موږ سره د مزو په جوړېدو کې ډېره مرسته کړې، اوس چې د موادو په لېږد کې هم راسره مرسته وکړي، ډېره به ښه وي.))

login or register a new account.