ښرنه (پژواک ٨ تله ٩٤): د پکتیکا ولایت په زرغون ښار ولسوالی کې د ځمکې پر سر د دوو کورنیو ترمنځ شخړه شوې، چې له امله یې له دواړو خواوو څخه اووه تنه ټپیان شوي دي.
د زرغون ښار ولسوال رازمحمد مخلص پژواک خبري اژانس ته وويل، چې دا پېښه نن د خيرکوټ يا زرغون ښار ولسوالۍ د محمدحسن په کلي کې د دواړو کورنیو ترمنځ له لفظي شخړې وروسته رامنځ ته شوې ده.
ده زياته کړه، سیمي ته یې سملاسي پولیس لېږلي، حالت يې کابو کړى او د ډېرې مرګ ژوبلې مخه يې نيولې ده.
د هغه په خبره، د سیمې قومي مشران د دواړو کورنیو ترمنځ په روغه جوړه بوخت دي او په لنډ وخت کې به دا ستونزه هوار شي.
بلخوا د پکتیکا ولایت د عامې روغتیا ريیس ډاکټر ولي ګل وايي، چې له يادې شوې پېښې څخه ٧ تنه ټپیان د ښرنې ملکي روغتون ته راوړل شوي وو.
هغه وايي، د ټپیانو له ډلې د پنځو تنو روغتیايې حالت نازک وو، چې د لا ښې درملنې په موخه د غزني ایمرجنسي روغتون ته ولېږدول شول.
د یادولو وړ ده، چې د پکتیکا په ډېرى ولسوالیو کې د ځینو کورنیو او قومونو ترمنځ د ځمکو او غرونو پر سر دښمنۍ شته، چې ځینو دښمنیو د سر د زیان په لرلو سره آن تر سلو کلونو زیات دوام کړی دى.
login or register a new account.
