کابل (پژواک، ۱۰ تله ۹۴): پاکستان وایي، دوی په افغانستان کې د یوه منتخب دیموکرات حکومت ملاتړ کوي او د طالبانو له خوا د کندوز ولایت د ځینو برخو نیول دوی ته د منلو وړ نه دي.
دغه څرګندونې د پاکستان د بهرنیو چارو وزارت مرستیال چوهدري اعزاز احمد، د ملګروملتونو کلنۍ غونډې په څنډه کې د یوې خبري غونډې پرمهال کړې دي.
د یادونې وړده، چې پنځه ورځې مخکې وسله والو طالبانو د کندوز ښار نیولی و، خو پرون سهار وخته افغان امنیتي ځواکونو وکولی شول دغه ښار بېرته ونیسي.
چوهدري اعزاز په یاده خبري غونډه کې ویلي: ((په افغانستان کې یو قانوني منتخب حکومت جوړ دی او د کومې ډلې له خوا د دې هېواد د کومې برخې نیول، د پاکستان لپاره د منلو وړ نه دی.))
دا په داسې حال کې ده، چې په واشنګټن کې د سپينې ماڼۍ ویاند جوش ارنسټ، پرون په یوه خبري غونډه کې د افغانستان له ګاونډیو هېوادونو وغوښتل، چې د ولسمشر اشرف غني په مشرۍ د افغانستان د ملي یووالي حکومت کلک ملاتړ وکړي.
تردې مخکې د افغانستان د حکومت اجرائیه رییس ډاکټر عبدالله د ملګرو ملتونو کلنۍ غونډې ته وویل، چې بریدکوونکي د افغانستان له بهر څخه راځي.
login or register a new account.
