کلات (پژواک، ٢٣ تله ٩٤): د زابل د مرکز کلات ښار اړوند په خارجوي سيمه کې له دريو ورځو راهيسې وسله والو طالبانو د کابل- کندهار لويه لار د ترافيکو پر مخ تړلې ده.
د دغه ولايت د والي وياند ګل اسلام سيال د تلې په ٢٣مه پژواک خبري اژانس ته وويل چې وسله والو طالبانو د کلات ښار اړوند په سپينې غبرګي او خارجوى سيمو کې د کابل- کندهار لويه لار د ترافيکو پر مخ تړلې وه.
هغه زياته کړه، امنيتي ځواکونو پرون وکولاى شول د سپينې غبرګې په سيمه کې لار د ترافيکو پر مخ پرانيزي، خو د خارجوى په سيمه کې اوس هم تړلې ده.
د ده په وينا، امنيتي ځواکونه سيمې ته ورغلي، څو لاره د خلکو پر مخ خلاصه کړي.
د نوموړي د معلوماتو له مخې، په تېرو دريو ورځو کې په دغه ولايت کې د امنيتي ځواکونو او وسله والو مخالفينو تر منځ جګړه کې د ٦٠ په شاوخوا کې طالبان ټپي او وژل شوي دي.
د سپينې غبرګې سيمې اوسېدونکى عصمت الله هم وايي، د خارجوى په سيمه کې وسله والو طالبانو لاره بنده کړې او خلکو ته د تګ راتګ اجازه نه ورکوي.
ده پژواک ته وويل، اوس هم د دې سيمې په خان کلي او نورک سيمو کې د امنيتي ځواکونو او طالبانو تر منځ جګړه روانه ده.
دا په داسې حال کې ده چې پرون د کندهار امنيه قوماندان جنرال عبدالرازق هم د زابل د امنيتي حالاتو د کابو کولو په موخه دغه ولايت ته تللى دى.
خو د وسله والو طالبانو وياند قاري يوسف احمدي، پژواک ته وويل چې طالبانو له تېرو دريو ورځو راهيسې د زابل ولايت له شاجوى ولسوالۍ نه تر شهر صفا ولسوالۍ پورې د کابل کندهار لويه لار د ترافيکو پر مخ تړلې ده.
هغه زياته کړه، په دې سيمو کې د امنيتي ځواکونو او طالبانو تر منځ جګړه روانه ده چې هغوى ته يې درنه مرګ ژوبله اړولې ده.
د ده په خبره، په تېرو دريو ورځو کې دوه طالبان وژل شوي او ٦ نور ټپيان دي.
بايد وويل شي چې وسله والو طالبانو نن د ميدان وردګو ولايت په مربوطاتو کې هم د کابل- کندهار لويه لار د ترافيکو پر مخ تړلې وه.
login or register a new account.
GET IN TOUCH
NEWSLETTER
SUGGEST A STORY
PAJHWOK MOBILE APP