محمودراقي (پژواک، ٢٩ تله ٩٤): د کاپيسا په تګاب او اله ساى ولسواليو کې د وروستيو جګړو له امله له دې سيمو سلګونه کورنۍ کډوالې شوې دي.
د تګاب او اله سای ولسواليو اوسېدونکي وايي چې د څو اونيو راهيسې د دوی په سيمو کې د امنيتي ځواکونو او وسله والو مخالفينو تر منځ نښتې روانې دي چې له امله يې دوى هلته نور ژوند نه شواى کولى.
د دوى په وينا، د دغو جګړو پر مهال يو شمېر ملکي وګړو ته هم مرګ ژوبله اوښتې او ډېرى نور نادرکه دي او کورنۍ يې په اړه معلومات نه لري.
د اله سای د ولسوالۍ د جعفرخېلو سيمې يوه اوسېدونکي شاکر پژواک خبري اژانس ته وويل چې د جګړو پر مهال ډېرې مرمۍ د خلکو پر کورونو لګېږي.
د نوموړي په وينا چې د ولسوالۍ په شاهروخېل، داون خېل او نورو سيمو کې حالات ډېر خراب دي او د جګړو له امله يو شمېر کسان ټپيان شوي هم دي.
شاکر وايي چې له يادو سيمو سلګونه کورنۍ کابل، جلال اباد او د کاپيسا ولايت نورو سيمو ته کډوالې شوې دي.
د خالد په نوم د اله سای ولسوالۍ يوه بل اوسېدونکي هم پژواک ته ومنله چې د جګړو له امله ګڼ شمېر کورنۍ کډوالې شوې دي.
د هغه په وينا، وسله والو مخالفينو خلکو ته ويلي وو چې له خپلو کورونو بايد ووځي؛ ځکه چې دوى بريدونه پيلوي.
خالد وايي چې يو شمېر کورنۍ ووتې، خو اوس هم په سيمه کې ځينې کورنۍ شته چې په جګړو کې بندې پاتې دي.
ده زياته کړه چې د تګاب او اله ساى ولسوالۍ لاره بنده ده، خلکو خپل ډک کورونه پرېيښي او په يو جوړ جامو کې يې پلي نورو سيمو ته ځانونه رسولي دي.
د تګاپ د شکوټ سيمې يوه اوسېدونکي فيض محمد پژواک ته وويل چې وروستو جګړو د دې ولسوالۍ اوسېدونکو ته ځاني او مالي زيانونه اړولي دي.
د ده په وينا، د شکوټ په سيمه کې هم پر يو شمېر کورونو مرمۍ لګېدلې او خلکو ته يې مرګ ژوبله اړولې ده.
فيض محمد وايي چې له بېلابېلو کليو څخه ګڼ شمېر کورنۍ د ولايت مرکز او يا هم کابل ته ته کډه شوې دي.
د غيرت په نوم د تګاب ولسوالۍ يو اوسېدونکى وايي چې د جګړو له امله د خلکو باغونو ته هم درانه زيانونه اوښتي دي.
د کاپيسا د ولايتي شورا غړي الحاج عزيز الله ساپي هم ومنله چې د وروستيو جګړو له امله ګڼ شمېر کورنۍ کډوالې شوې دي.
هغه پژواک ته وويل: ((موږ په دې اړه خپلې هڅې کړې او د کډوالو رياست او اړوند نورې ادارې هڅه کوي چې د خلکو ستونزې هوارې کړي او ورسره مرستې وکړي.))
د کاپيسا د کډوالو او بېرته راستنېدونکو چارو رياست چارواکي وايي چې د تګاب او اله سای ولسواليو کڼ شمېر اوسېدونکي د جګړې له امله نورو سيمو او ولايتونو ته کډوال شوي دي، ځکه يې په اړه کره شمېره نه لري.
د کاپيسا د کډوال او بېرته راستنېدونکو چارو رييس محمد قسيم ملکزاده پژواک ته وويل چې دوى په دې اړه په ولايت کې بېړنۍ غونډه رابللې وه او له اړوندو مرستندويه ادارو سره يې هم اړيکې نيولې، څو له دغو کډوالو سره مرستې وشي.
د هغه په وينا، د دوى ټيمونه اړوندو سيمو ته رسېدلي او د کډوالو په اړه د معلوماتو د راټولولو په هڅو کې دي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن