کندوز (پژواک، ٥ لړم ٩٤): د کندوز د دشت ارچي ولسوالۍ امنيه قومانداني له طالبانو بېرته نيول شوې او د نښتې په ترڅ کې د طالبانو د مرستيال ولسوال په ګډون ١٥ وسله وال وژل شوي دي.
طالبانو دشت ارچي ولسوالۍ درې مياشتې وړاندې نيولې وه.
په کندوز کې د ملي اردو د دويمې پلې لوا وياند جګړن غلام حضرت کريمي وايي چې د (توپان ١٠) په نوم ګډ چاڼيز عمليات له تېرې شپې راهيسې د ارچي ولسوالۍ د بېرته نيولو په موخه له څو خواوو پيل شوي دي.
هغه پژواک خبري اژانس ته وويل چې د دشت ارچي ولسوالۍ د امنيې قوماندانۍ ودانۍ چې د ارچي د مرکز په دوه کيلومترۍ کې موقعيت لري، امنيتي ځواکونو نيولې او د ولسوالۍ د ودانۍ نيولو خوا ته پرمختګ کوي.
د کريمي په خبره، تر اوسه د طالبانو د مرستيال ولسوال ملا عبدالرحيم په ګډون ١٥ وسله وال مخالفين وژل شوي او درى نور ژوبل شوي دي.
د پوځ دغه چارواکي زياته کړه چې د ملي اردو د چورلکو په هوايي بريد کې د طالبانو درى رينجر موټر چې مخکې يې له امنيتي ځواکونو نيولي وو، ويجاړ شوي دي.
هغه وايي چې تر اوسه امنيتي ځواکونو ته زيان نه دى رسېدلى او عمليات به د ولسوالۍ تر بشپړ چاڼ پورې دوام ولري.
طالبانو تر اوسه په دې اړه څه نه دي ويلي.
د دشت ارچي اوسېدونکي له دغو عملياتو هرکلى کوي او د ولسوالۍ د بېرته نيولو غوښتونکي دي.
د عبدالشکور په نوم د دشت ارچي يوه اوسېدونکي وويل چې امنيتي ځواکونه له تېرې شپې راهيسې له طالبانو سره ښکېل دي.
هغه زياته کړه، هوا په سړېدو ده، ګډ امنيتي ځواکونه هڅه کوي چې د خلکو له بې ځايه کېدو او مرګ ژوبلې مخنيوى وشي.
امنيتي چارواکي وايي، په دغو عملياتو کې هڅه کېږي چې ملکي خلکو ته زيان ونه رسېږي.
login or register a new account.
GET IN TOUCH
NEWSLETTER
SUGGEST A STORY
PAJHWOK MOBILE APP