د پکتیکا د جاني خېلو خلکو له امنیتي ځواکونو ملاتړ اعلان کړ

ښرنه (پژواک، ٢٧ لړم ٩٤): د پکتيکا د جاني خېلو ولسوالۍ اوسېدونکو له امنيتي ځواکونو ملاتړ وکړ او ويې ويل چې په هره برخه کې له حکومت سره همکارۍ ته چمتو دي.

د پکتيکا د جاني خېلو اوسېدونکو دغه څرګندونې په هغې غونډه کې وکړې چې د دغه ولايت والي امين الله شارق هم حضور درلود.

د جاني خېلو ولسوالۍ قومي مشر ملک ظاهر کټوازي وويل چې د دې ولسوالۍ اوسېدونکي له امنيتي ځواکونو ملاتړ کوي او په هره برخه کې له دولت سره همکارۍ ته چمتو دي.

خو هغه ټينګار وکړ چې حکومت بايد د دې ولسوالۍ د امنيت د ټينګښت تر څنګ د روغتيا، پوهنې، ښې حکومتولى او نورو برخو ته جدي پاملرنه وکړي.

ده زياته کړه: ((افغانانو اوس خپل دښمن پېژندلی دى، هېڅکله به اجازه ورنه کړي چې خپل شوم اهداف ترسره کړي، افغانان نور له جنګه ستړي شوي او ټول د سولې تږي یو او په ټول توان سره به د سولي له روان بهیر سره مرسته کوو.))

د دې ولسوالۍ بل اوسېدونکي جان محمد هم وويل چې د دې ولسوالۍ اوسېدونکي د سولې راوستو او په نورو برخو کې له دولت سره همکار دي.

هغه په وسله والو مخالفينو هم غږ وکړ چې له مخالفته لاس واخلي او د هېواد د هوساينې په موخه له دولت سره يو ځاى شي.

په دې غونډه کې د پکتيکا د ولايتي شورا غړي فضل الرحمن کټوازي وويل چې د هېواد د ښې راتلونکې په موخه بايد ولسونه له دولت نه ملاتړ وکړي او يو خپل يووالى وساتي.

ده پر ديني عالمانو هم غږ وکړ چې د سولې راوستو په برخه کې له حکومت سره اړينه همکاري وکړي.

په ياده غونډه کې د پکتيکا والي امين الله شارق هم د چارو په پر مخ بيولو او د امنيت په ټينګښت کې د ولسونو پر همکارۍ ټينګار وکړ.

هغه وويل: ((موږ به هېڅکله چا ته اجازه ورنه کړو چې زموږ امنيت خراب کړي او يا هم نورې ستونزې پيدا کړي.))

ده د يادې ولسوالۍ له خلکو سره ژمنه وکړه چې د ستونزو د حل په برخه کې به يې نه ستړې کېدونکي هلې ځلې وکړي.

login or register a new account.