چاودنې د ښځو او ماشومانو په ګډون ١٢ ملکي وګړو ته مرګ ژوبله واړوله

کلات (پژواک، ٢٨ لړم ٩٤): چارواکي وايي چې په زابل ولايت کې د يوې چاودنې له امله د ښځو او ماشومانو په ګډون ١٢ ملکي وګړو ته مرګ ژوبله اوښتې ده.

د دغه ولايت د امنيې قوماندانۍ د امنيت امر غلام جيلاني فراهي د لړم په ٢٨مه پژواک خبري اژانس ته وويل چې دا پېښه نن  غرمه شاوخوا يوه بجه د سيوري ولسوالۍ د عمرزو په سيمه کې رامنځته شوې ده.

هغه زياته کړه چې د دوو کورنيو غړي په يوه تراکتور موټر کې روان وو چې د سړک  غاړې پر ماين ور برابر شول.

د نوموړي په وينا، په دې چاودنه کې دری مېرمنې او يو ماشوم وژل شوي، د ښځو او ماشومانو په ګډون اته تنه نور ژوبل شوي دي.

فراهي وايي چې ټپيان د سيوري او شينکۍ ولسواليو کلينيکونو ته لېږدول شوي دي.

د امنيت امر وايي چې دغه ماين د وسله والو مخالفينو له خوا امنيتي ځواکونو ته ځاى پر ځاى شوى و، خو ملکي وګړي يې قرباني شول.

وسله والو مخالفينو تر اوسه په دې اړه څه نه دي ويلي.