لوګر کې ۲۰۰ میله وسله ډایاګ ته وسپارل شوه

پل علم (پژواک، د ليندۍ لومړۍ نېټه ٩٤): د لوګر ولايت کومانډو ځواکونو شاوخوا ٢٠٠ ميله هغه وسله ډاياګ ته وسپارله چې په تېرو څو مياشتو کې يې د عملياتو پر مهال نيولې وه.

په لوګر ولايت کې د کومانډو ځواکونو د لومړۍ لوا قوماندان بريد جنرال امان الله مبين د يادو وسلو د سپارلو په غونډه کې پژواک خبري اژانس ته وويل چې دغه وسلې کومانډو ځواکونو په دغه ولايت کې له بېلابېلو سيمو د عملياتو پر مهال ترلاسه کړي دي.

هغه زياته کړه: ((دغه وسله په تيرو اتو مياشتو کې موږ ترلاسه کړى، د دې وسلو په ترلاسه کولو سره په لوګر کې طالبان ډير ضعيفه شوي دي موږ سره اوس د مخامخ جګړې توان نه لري.))

د مبين په وينا چې په دې وسلو کې ٨ ميله راکټ، ٥٩ کلاشينکوفونه، ١١ميله پيکا، ١٧ ميله کارابين، ٨٣ ميله يوولس ډزې او ځيني نورې وسلې شاملې دي.

ده وويل چې د يادو وسلو د ترلاسه کولو پر مهال ګڼو وسله والو طالبانو ته مرګ ژوبله اوښتې او ځيني نور يې ژوندي نيول شوي دي.

هغه وويل چې امنيتي ځواکونو د ډاياګ (وسلو ټولولو پروګرام) د پروسې له پيله  تر دې دمه زرګونه ميله وسلې  دغه پروګرام ته سپارلې دي .

د کورنيو چارو وزارت د معلوماتو له مخې، ډاياګ پروګرام په ٢٠٠٣ زيږديز کال کې په افغانستان کې پيل شوى او تر اوسه زرګونه ميله درنه او سپکه وسله دغه پروګرام ته سپارل شوې ده.