ګردېز (پژواک،٥ليندۍ٩٤): د پکتيا د کرنې رياست له خوا د دې ولايت بزګرانو ته د غنمو د لسګونه ټنه اصلاح شويو تخمونو د وېش لړۍ پيل شوه، خو کروندګر وايي، د غنمو د کرلو وخت تېر شوى دى.
د دې ولايت د کرنې او مالدارۍ رييس ذبيح الله حسن زي د ليندۍ په پنځمه، پژواک خبري اژانس ته وويل، دغه رياست په پام کې لري سږکال د مرکز او ولسواليو پر کروندګرو ١٢٠ ټنه اصلاح شوي تخمونه و وېشي.
هغه زياته کړه: ((تېر کال دغه اندازه دوه سوه ټنه وه، خو سږکال وزارت د بوديجې له کسر سره مخ دى، نو ځکه يې د پکتيا په ګډون نورو ولايتونو ته هم لږ اصلاح شوي تخمونه ورکړي دي.))
حسن زي وويل، د دې غنمو ټوليزه بيه ٤.٥ ميليونه افغانۍ ده او د نورو تخمونو په پرتله زيات حاصلات ورکوي.
د پکتيا د احمد ابا ولسوالۍ يوه کروندګر رسول ګل پژواک ته وويل: ((اصلاح شوي تخمونه په داسې وخت کې موږ ته راکړل شول، چې د غمنو د کرلو وخت تېر شوی دی.))
ده زياته کړه، د پکتيا په ګډون د هېواد په ډېر شمېر ولايتونو کې غنم د تلې په مياشت کې کرل کېږي.
نوموړی وايي، دوی داسې ځايونه نه لري، چې تر يوه کال پورې دغه اصلاح شوي تخمونه په کې وساتي.
خو د پکتيا د کرنې او مالدارۍ رييس وايي، تيره اوونۍ دغه تخمونه د وزارت له لوري دوى ته ورکړل شوي او اوس يې په بزګرانو د وېشلو لړۍ پيل کړه.
login or register a new account.
