مزارشريف (پژواک، ٧ ليندۍ ٩٤): چارواکي وايي چې د بلخ په ځينو امنيتي پېښو کې د حزب اسلامي يو پخوانى جهادي قوماندان او يو اربکی وژل شوي دي.
د بلخ د امنيې قوماندانۍ وياند شېرجان دراني د ليندۍ په ٧ مه پژواک خبري اژانس ته وويل چې پرون له غرمې وروسته په دولت اباد ولسوالۍ کې د مولوي خليل الله لودين په نوم يو کس د وسله والو له خوا وژل شوى دى.
هغه زياته کړه چې نوموړی د جمعې تر لمانځه وروسته خپل کور ته روان و چې په لاره کې د موټرسايکل سپرو وسله والو له خوا وژل شوى دى.
دراني وويل چې بريدګر تښتېدلي او پوليسو يې په اړه پلـټنې پيل کړې دي.
د قدرت الله په نوم د سيمې يوه اوسېدونکي پژواک ته وويل چې مولوي لودين د حزب اسلامي پخوانى جهادي قوماندان و، خو اوس په خپل کور کې ناست او کومه دنده يې نه لرله.
د اجرائيه رياست لومړي مرستيال انجنير محمدخان د د مولوي خليل الله لودين وژنه غندلې او له کورنۍ سره يې خواشيني څرګنده کړې ده.
د هغه له خوا پژواک ته په يوه رالېږل شوې خبرپاڼه کې راغلي چې مولوي لودين د شوروي اتحاد پر وړاندې د افغانانو په جهاد کې فعاله ونډه اخيستې وه او بيا د هجرت پر مهال يې د ښوونکي په توګه زرګونه ماشومان روزلي دي.
انجنير محمد خان امنيتي ارګانونو ته سپارښتنه کړې چې د هغه قاتلين د قانون منګولو ته وسپاري.
بلخوا د بلخ په چاربولک ولسوالۍ کې يو تن اربکي د خپل قوماندان له خوا وژل شوى دى.
د دې ولسوالۍ يوه اوسېدونکي محمدايوب پژواک اژانس ته وويل چې دا پېښه نن سهار د ولسوالۍ د ادينه مسجد په سيمه کې رامنځته شوې ده، خو نوموړي يې په اړه نور معلومات نه درلودل.
شېرجاني له دې پېښې بې خبري وښوده.
د يادونې ده، په دې وروستيو کې په بلخ ولايت کې د ترور پېښې زياتې شوې دي.
login or register a new account.
