دويم تعقيب- مزارشريف (پژواک، ١٩ سلواغه ٩٤): په بلخ ولايت کې د ملي اردو پر يوه موټر ځانمرګي بريد کې ٣ سرتېري وژل شوي او ١٨ نور ټپیان دي، خو عيني شاهدان د مرګ ژوبله کچه تر دې هم لوړه ښيي.
د بصير په نوم يوه عيني شاهد د سلواغې په ١٩مه پژواک خبري اژانس ته وويل چې دغه ځانمرګى بريد نن سهار شاوخوا اووه نيمې بجې د مزارشريف ښار په څنډه د دهدادي ولسوالۍ د نواب اباد په سيمه کې شوى دى.
د بلخ د امنيې قوماندانۍ د امنيت امر سمونوال عبدالرزاق قادري پژواک اژانس ته وويل چې ځانمرګي بريدګر د ملي اردو يو کاسټر موټر چې د شاهين قول اردو قوماندانۍ ته روان و، په نښه کړى دى.
هغه زياته کړه چې په دغه بريد کې ١٨ سرتېري ټپيان شوي دي.
خو د والي وياند منير فرهاد پژواک اژانس ته وويل چې په دغه بريد کې د ملي اردو درې سرتېري وژل شوي او ١٨ نور ټپیان دي.
د عبدالستار په نوم د سيمې يوه اوسېدونکي پژواک اژانس ته وويل چې دوى د سهار د لمانځه لپاره په جومات کې وو چې ناڅاپه يې د درنې چاودنې غږ واورېد.
دى وايي چې په خپلو سترګو يې اته مړي او ګڼ نور ټپيان ليدلي دي.
د نواب اباد سيمې د انکشافي شورا مشر عبدالصبور پژواک اژانس ته وويل چې تر پېښې ٢٠ دقيقې مخکې د سيمې اوسېدونکو په نظامي جامو کې يو تن ليدلى چې پر موټرسايکل په سيمه کې ګرځېده.
د هغه په وينا، کېداى شي همدا ځانمرګى بريدګر و او د ملي اردو د موټرو په انتظار و.
وسله والو طالبانو د دغه بريد مسووليت پر غاړه اخيستى دى.
طالب وياند ذبيح الله مجاهد وايي چې يوه بريدګر د ملي اردو پر کاسټر بريد کړى او ګڼه مرګ ژوبله يې ور اړولې ده.
د يادونې ده، يادې سيمې ته نږدې د ملي اردو د شاهين قول اردو قومانداني هم موقعيت لري.
login or register a new account.
