شپږ طالبان وژل شوي او شپږ نور نيول شوي

ښرنه (پژواک ٢٨ سلواغه ٩٤): د پکتيکا چارواکي وايي، په ګومل ولسوالۍ کې د هوايي بريد په ترڅ کې شپږ وسله وال طالبان وژل شوي دي.

د دې ولايت د والي وياند نبي الله پيرخېل، پژواک خبري اژانس ته وويل چې دغه کسان د ګومل ولسوالۍ په راغي سيمه کې د ناټول ځواکونو له خوا تر بريد لاندې نيول شوي او وژل شوي دي.

ده زياته کړه، دا کسان د ګومل ولسوالۍ لپاره د طالبانو د ولسوال عصمت الله ملګري وو، چې جسدونه يې سهار ناوخته طالبانو له ځان سره لېږدولي دي.

د ګومل ولسوالۍ يوه اوسېدونکي شاه محمود پژواک ته وويل، دغه بمبار تېره شپه د طالبانو په يوه پټنځاى شوى، چې له امله يې شپږ تنه وژل شوي او د هغوى يوه اندازه مهمات هم په کې له منځه تللي دي.

د والي وياند دغه راز وايي، په برمل ولسوالۍ کې د عملياتو پرمهال دوه وسله وال طالبان له يوې اندازې وسلې او مهماتو سره يوځاى نيول شوي دي.

د يوه بل خبر له مخې، د لوګر په مرکز پل علم کې د ملي امنيت له لوري څلور تنه د ترهګريزو کړنو په تور نيول شوي دي.

د لوګر د والي وياند سليم صالح، پژواک اژانس ته وويل چې دغه کسان د مرکز په يوې اړوندې سيمه کې د ملي امنيت ځواکونو د عملياتو پرمهال له وسلو او چاودېدونکو سره يوځاى نيول شوي دي.

هغه زياته کړه، ياد شوي کسان د طالبانو د مشهور قومندان ملا حنيف ملګري دي، چې له څو کلونو راپدېخوا يې د مرکز په شاوخوا سيمو کې تخريبي کړنې ترسره کولې، چې په نيول کېدو سره به يې په امنيتي حالت کې ښه والى راشي.

د ده په وينا، له دې کسانو سره يو راکټ، دوه پيکا، درې موټرسايکلونه، ١٥ د پرسونل ضد ماينونه، چاودېدونکي توکي، د ميزاييل او راکټ مرمۍ نيول شوې دي.

وسله والو طالبانو بيا د يادو ټولو پېښو په اړه تراوسه پورې څه نه دي ويلي.