غزني ښار (پژواک، ۲۹ سلواغه ۹۴) د غزني د اندړو ولسوالۍ لسګونو اوسېدونکو، نن په داسې حال کې چې د ولسي پاڅون د وسله والو له لوري یې یو وهل شوى کس ورسره لېږداوه، د ولسي پاڅون د وسله والو پر ضد د ولایت مقام او امنیه قوماندانۍ مخې ته لاریون وکړ.
دغو لاریون کوونکو ویل چې په سیمه کې د ولسي پاڅون وسله وال ورسره زور زیاتی کوي او پر دوی يې ورځنی ژوند تریخ کړی دی.
هغوی یو ښوونکی چې همدا تېره شپه ولسي پاڅون کوونکو د یادي ولسوالۍ د کجیري په سیمه کې لومړی پر موټر او وروسته یې د کونداغونو په وسیله د مرګ تر بریده وهلی و، هم له ځان سره لېږداوه، چې د سختو ټپونو له کبله یې خبرې نه شوای کولی.
د دې ولسوالۍ د کجیري سیمې اوسېدونکي رحیم الله، پژواک خبري اژانس ته وويل چې دا کس د شاهین په نوم د پاڅونوالو یو قوماندان وهلی او ډبولی دى.
دى وايي: "مخکې د دې پوستې قوماندان بازمحمد خاکسار و، اوس د شاهین په نوم دى چې اصلاً د غزني د ګیرو ولسوالۍ اوسېدونکی دى، چې رسمي ښوونکى يې په ناحقه د مرګ تر بريده وهلى دى."
د لاريون کوونکو په وینا، د ولسي پاڅون وسله وال د دې ترڅنګ چې له هرې کورنۍ څخه د میاشتې ٥٠٠ کلدارې نغدې پیسي، خوراکي، د سون او پوښاک توکي اخلي، په بېلابېلو پلمو ولسي وګړي نیسي او بندیانوي یې.
د اندړو مشرانو د غزني له ځایې چارواکو سره په لیدنه کي غوښتنه وکړه، چې د ولسي پاڅون وسله وال دې د دوی له سیمو وباسي او پر ځای دې د ملي پولیسو او یا هم ملي اردو سرتېري ځای پر ځای کړي.
قومي مشر حاجي عبدالاحد وايي، دولت باید د خلکو عزت وساتي، نه دا چې د دوى عزت لوټ کړي.
ده زياته کړه، د اندړو اوسېدونکي نور په دې سیمه کې پاڅون کوونکي نه غواړي، ځکه ظلمونه يې تر طالبانو هم زيات دي.
دى وايي: "ملي اردو، ملي پولیس، ملي امنیت دې راشي، منو يې، خو پاڅون نور نه منو."
د غزني د ولایتي شورا غړى او د اندړو اوسېدونکى عبدالجامع جامع هم وايي، چې پاڅون کوونکي په سیمه کې زیات ظلمونه کوي، چې خلک ورنه په تنګ راغلي دي.
د ده په خبره، دا کسان له تېرو څو کلونو راهیسې د خلکو په مال او عزت تجاوز کوي او له خلکو څخه په زور پیسې اخلي او غلاوې کوي، د دې ترڅنګ هغه کسان چې پیسې ورته ورنه کړي، نو وهي يې او په شپو شپو يې بندي کوي.
login or register a new account.
GET IN TOUCH
NEWSLETTER
SUGGEST A STORY
PAJHWOK MOBILE APP