په لغمان کې ځانمرګى بريدګر نيول شوى

کابل (پژواک، ٢٩ سلواغه ٩٤) : د ملي امنيت لوى رياست په لغمان ولايت کې د يوه ځانمرګي بريدګر د نيول کېدو خبر ورکړى دى.

په کابل کې د ياد رياست مطبوعاتي دفتر له خوا د سلواغې په ٢٩مه، پژواک اژانس ته په يوه رالېږل شوې خبرپاڼه کې ويل شوي چې دا بريدګر څو ورځې مخکې نيول شوى دى.

سرچينې زياته کړې چې دغه بريدګر له چاودېدونکو توکو ‌ډک واسکټ سره د لغمان د اوسېدونکو په همکارۍ نيول شوى دى.

ملي امنيت وايي چې نيول شوي تن هوډ درلود د مهترلام ښار په يوه له ګڼې ګوڼې ډکه سيمه کې ځانمرګی بريد وکړي، خو تر بريده مخکې ونيول شو.

د لغمان ځايي اداره او وسله والو مخالفينو تر اوسه په دې  اړه څه نه دي ويلي.