کندهار (پژواک، ٥ ورى ٩٥): د کندهار ولايت روغتيايي چارواکي وايي چې په تېر يو کال کې په دغه ولايت کې شاوخوا درې زره د نري رنځ پېښې ثبت شوې دي.
د کندهار روغتیايي چارواکو دغه څرګندونې نن د نري رنځ ناروغۍ د مخنیوي د نړیوالې ورځې په مناسبت جوړې شوې غونډې ته وکړې.
په کندهار کې د نري رنځ ناروغۍ د مخنيوي څانګې مشر محمد حسین اکرمي وويل چې د تېر کال په اوږدو کې یې ٢٠٩٨ د نري رنځ پېښې ثبت کړې دي چې ۶۴ سلنه یې مېرمنې دي.
د نوموړي په وینا، دوی د کندهار ښار او د ولسوالیو په ټولو شخصي او دولتي روغتیایي مرکزونو کې د نري رنځ د تشخیص څانګې جوړې کړې او زیاتوي چې تر دې مهاله یې شاوخوا ١٣٠٠ کسانو درملنه کړې ده.
اکرمي د خپلو خبرو پر مهال زیاته کړه چې دوی په کندهار ولایت کې د هر ډول ناروغیو د تشخیص په موخه د یوه مجهز لابراتوار د جوړېدو چارې هم پيل کړې چې دا مهال یې ۸۰ سلنه چارې بشپړې شوې دي.
په ورته وخت کې د کندهار د عامې روغتیا ريیس عبدالقیوم پخلا بيا وايي چې د نري رنځ تر څنګ يې په دغه ولايت د نورو ناروغيو د مخنيوي لپاره هر ډول هڅې کړې دي.
د نوموړي په وینا، اوس مهال دوی د کندهار ښار تر څنګ په ډېرو ولسوالیو کې روغتیایي مرکزونه جوړ کړي او په هر مرکز کې د ناروغانو درملنه په منظمه توګه روانه ده.
د عامې روغتيا وزارت د معلوماتو له مخې، هر کال زرګونه کسان په هېواد کې د نري رنځ په ناروغۍ اخته کېږي چې يو شمېر بيا خپل ژوند هم له لاسه ورکوي.
login or register a new account.
