محمودراقي (پژواک، ٢١ غويى ٩٥): چارواکي وايي چې په کاپيسا ولايت کې د دولت ١٢ وسله وال مخالفين د سولې له پروسې سره يو ځاى شول.
د دغه ولايت د سولې د ولايتي کمېټې رييس مولوي عبدالمومن مسلم د غويي په ٢١مه پژواک خبري اژانس ته وويل چې دغه ډله له تېرو څو کلونو راهيسې د اله ساى ولسوالۍ د سکين او اشپې په سيمو کې وسله وال فعاليتونه کول.
هغه زياته کړه چې دوى د امنيتي ځواکونو او سولې شورا د هلو ځلو په پاى کې د سولې له پروسې سره يو ځاى شول.
د مولوي مسلم په وينا، سږ کال د تېرو کلونو په پرتله ډېری وسله وال مخالفين د سولې له بهير سره يو ځای کېږي او دوى په دې برخه کې خپلې هڅې ګړندۍ کړې دي.
د کاپيسا د سولې د ولايتي کمېټې رييس وويل چې ډېر ژر به نور لسګونه وسله وال مخالفين هم د سولې له پروسې سره يو ځاى شي.
هغه زياتوي: ((د سولې له پروسې سره د وسله والو مخالفينو په يو ځاى کېدو سره په تګاب او اله ساى ولسواليو کې امنيت ښه شوى دى.))
د کاپيسا امنيه قوماندان مل پاسوال عبدالکريم فايق پژواک اژانس ته وويل چې ياد ١٢ کسان د اله ساى ولسوالۍ د سيمه ييزو پوليسو د قوماندان شکرا لله خان په هڅو د سولې له پروسې سره يو ځاى شوي دي.
هغه زياته کړه چې د دې کسانو په يو ځاى کېدو سره به د يادو سيمو امنيت ښه شي.
وسله والو طالبانو تر اوسه په دې اړه څه نه دي ويلي.
د يادونې ده، په روان کال لمريز کې د حکومت ۱۰۰ تنه وسله وال مخالفين په کاپيسا ولايت کې د سولې له پروسې سره يو ځای شوي دي.
login or register a new account.
