پکتيکا کې چاودنې ١٢ تنه ژوبل کړل

ښرنه (پژواک ١٠ غبرګولى ٩٥): د پکتيکا چارواکي وايي، د دې ولايت په بټخېلو ولسوالۍ کې د چاودنې له امله يو سيمه ييز پوليس او ١١ عام وګړي ټپيان شوي دي.

د دې غير رسمي ولسوالۍ ولسوال بدرالدين، پژواک خبري اژانس ته وويل چې دغه چاودنه نن ماښام ناوخته د ولسوالۍ په بازار کې د توت په يوه ونه کې د ځاى په ځاى شويو چاودېدونکو توکو د چاودنې له امله رامنځ ته شوې ده.

ده زياته کړه، کله چې له يوې هټۍ څخه يو سيمه ييز پوليس راووت او د ونې خوا ته روان و، نو په همدې مهال چاودنه وشوه، چې له امله يې ياد شوى سيمه ييز پوليس، د هغه پلار او لس تنه نور عام وګړي ژوبل شول.

د هغه په وينا، په ټپيانو کې د ځينو روغتيايي حالت نازک ښودل شوى دى.