حکومت دې د پاکستان د لاسوهنو پر وړاندې جدي چلند وکړي

ښرنه (پژواک، ٢٨ چنګاښ ٩٥): د پکتيکا سلګونو اوسېدونکو د يوې پراخې غونډې په ترڅ کې د وارسا کنفرانس په لاسته راوړنو خوښي څرګنده کړه او له حکومته يې وغوښتل، چې د  پاکستان د لاسنوهنو پر وړاندې جدي چلند وکړي.

د پولينډ په پلازمېنې وارسا کې د ناټو د سرمشريزې غونډې پر مهال له افغانستان سره د مالي او پوځي مرستو او اوږدمهاله سياسي همکاريو اعلان او ژمنې وشوې.

د پکتيکا سلګونو اوسېدونکو د چنګاښ په ٢٨مه د ولايت په مرکز ښرنې ښار کې د يوې پراخې غونډې په ترڅ کې د وارسا د غونډې له پرېکړې هرکلى او د ولسمشر د ملاتړ اعلان يې وکړ.

د دې ولايت د مدني ټولنو د همغږۍ د دفتر مرستيال يعقوب خان منظور د وارسا کنفرانس د افغانستان لپاره مهم وباله او زياته يې کړه، له دې کنفرانس څخه د لسمشر اشرف غني يوه لويه لاسته راوړنه تر ۲۰۲۰ کاله پورې د افغان ځواکونو تجهيز او مرستې دي.

هغه زياته کړه، په ياد کنفرانس کې د افغانستان د ګاونډي هېواد پاکستان چې تل يې وسله والو طالبانو ته په خپله خاوره کې ځای ورکړی، دروغجنه څېره نړيوالو ته په ډاګه شوه.

منظور وايي، د دې ولايت ولسونه د ولسمشر د هرې حقې پرېکړې ملاتړ کوي او د سر په بيه ترې دفاع کوي.

د کټواز اوسېدونکي خورشيد امان کټوازي هم وويل، چې ولسمشر ورو، ورو خپلو ژمنو ته د عمل جامه ورکوي، چې ښه بېلګه يې دو ارسا کنفرانس لاسته راوړنې او د نړيوالو مرستو را جلبول دي.

نوموړي هم د پاکستان دوه مخي سياست ته اشاره وکړه او ويې ويل، پاکستان نه غواړي افغانستان په خپلو پښو ودرېږي .

هغه له دولته وغوښتل، چې د پاکستان پر وړاندې له ډيپلوماتيکو لارو کار واخلي او د هېواد په کورنيو چارو کې ورته د لاسوهنې اجازه ورنه کړي.

د دې ولايت د ولايتي شورا رييس مبين فقيرزاده هم په پکتيکا کې د قومي جوړښتونو يادونه وکړه او زياته يې کړه، دا ولسونه تل د ملی يووالي حکومت تر شا ولاړي دي.

دى وايي: ((د افغان ځواکونو تجهيز، روزنه او نړيوالې ټولنې ملاتړ دې ته زمينه برابروي چې دا هېواد په خپلو پښو ودرېږي او له خپلو زېرمو او کرنيزو ځمکو ښه استفاده وکړي.))