د مزارشريف ځانمرګي بريد کې يو ملکي وګړى وژل شوى او ١٥ نور ټپيان دي

لومړى تعقيب- مزارشريف (پژواک، ١٩ زمرى ٩٥): د بلخ په مرکز مزارشريف ښار کې د ځانمرګي بريد له امله يو ملکي وګړى وژل شوى او ١٥ نور ټپيان دي.

عيني شاهدان وايي چې دغه ځانمرګى بريد نن (د زمري ١٩مه) د غرمې شاوخوا دوولس نيمې بجې د مزارشريف ښار اړوند روضې ته نږدې د منډوي تر څنګ شوى.

د مزار شريف د ملکي روغتون سرطبيب ډاکټر نورمحمد فيض پژواک اژانس ته وويل چې دوى ته يو مړی او ١٥ ټپيان ور وړل شوي دي.

نوموړي دمګړۍ د ټپيانو د روغتيايي حالت په اړه معلومات نه درلودل.

د عبيدالله په نوم يوه عيني شاهد پژواک اژانس ته وويل چې ځانمرګى پلى و او د خلکو په منځ کې يې ځان ته چاودنه ورکړه.

په سيمه کې د ځانمرګي بريدګر جسد ليدل کېږي چې دوه ټوتې شوى دی.

دغه راز د پېښې ټپيان د پوليسو او خلکو له خوا روغتون ته لېـږدول شوي دي.

د مزارشريف د ملکي روغتون يوې سرچينې پژواک ته وويل چې دوى ته يو مړی او شپږ  ټپيان ور وړل شوي دي.

په دې اړه به نور جزئيات وروسته خپاره شي.