د لوګر پوهنتون ته د لیلیې ودانۍ جوړېږي

پل علم (پژواک، ١٥ وږى ٩٥): د شل ميليونو افغانيو په لګښت د لوګر پوهنتون لپاره د ليليې ودانۍ د جوړونې چارې پيل شوې.

د اړوندې موضوع په اړه جوړې شوې غونډې ته د لوګر والي حليم فدايي وويل چې دغه ودانۍ به د شل ميليونه افغانيو په لګښت د ١٥ مياشتو په موده کې ورغول شي.

د فدايي په وينا، دغه ودانۍ په دوو پوړونو کې جوړېږي چې ٢٤ خونې به لري او دوه سوه کسانو ته به د هستوګڼې اسانتياوې برابر کړي.

د هغه په خبره، د يادې پروژې مالي لګښت بلاعوضه د هندوستان هيواد له لوري ورکول کېږي.

په دې غونډه کې د لوګر د پوهنتون رييس پوهنمل وحيدالله عبدالرحيمزي وويل چې تر دې وړاندې يې محصلينو ته د ليليې په نوم څه نه درلودل.

ده وويل: ((زموږ زده کوونکي د زده کړو لپاره هم ځاى نه لري، اوسمهال د پوهنې وزارت اړوند د عالي دارالعلوم په ودانۍ کې زده کړې کوي.))

څه موده وړاندې د لوګر پوهنتون د ودانۍ د جوړېدو چارې هم پيل شوې دي.

په ياده غونډه کې د لوګر د ولايتي شورا مرستيال عبدالقسيم خوشيوال وويل چې د يادې ودانۍ پر جوړېدو ډېر خوښ دى.

هغه وويل چې د دې ودانۍ په جوړېدو سره به د لوګر پوهنتون پر بسیا شي او ډېر کسان به زده کړو ته مخه کړي.

د لوګر پوهنتون دا مهال په کيميا او بيولوژي څانګو کې ٣٠٥ تنه محصلين لري چې ٢٥ يې نجونې دي.