ښرنه (پژواک، ٢٩ وږى ٩٥): د پکتيکا والی وايي چې د يوې مياشتې په موده کې به د امنيتي ځواکونو له ليکو هغه کسان وباسي چې قانوني عمرونه يې نه وي پوره کړي او جذبوونکو ته به يي هم سزا ورکړل شي.
د پکتيکا والي الياس وحدت دغه څرګندونې د وږي په ٢٩مه په هغې غونډه کې وکړې چې د کورنيو چارو، ملي دفاع وزارت، عدليې وزارت، ولسمشری ماڼۍ، لویې څارنوالۍ او د بشري حقونو د خپلواک کمېسيون استازو په کې هم ګډون درلود.
په دې غونډه کې د بشري حقونو د خپلواک کمېسيون د ماشومانو څانګې مشر عبدالله عابد وويل چې پکتيکا ته د دوی د راتګ موخه د امنيتي ځواکونو له ليکو ليدنه او له هغو څخه د کم عمره ماشومانو ايستل دي.
نوموړي زياته کړه چې په نړيوالو غونډو کې پر افغانستان نيوکې شوې چې د امنيتي ځواکونو په ليکو کې يې کم عمره ماشومان دندې ترسره کوي.
د هغه د معلوماتو له مخې، ولسمشر غني يو فرمان صادر کړی چې له مخې بايد ټول هغه کسان د امنيتي ځواکونو له ليکو و ايستل شي چې قانوني عمرونه يې نه دي پوره کړي.
ده وويل: ((د پکتيکا چارواکي بايد په يوه مياشت کې موږ ته معلومات راکړي چې څومره ماشومان يې د امنيتي ځواکونو له ليکو څخه ايستلي دي.))
خو د بشري حقونو د خپلواک کمېسيون د ماشومانو څانګې مشر دا ونه ويل چې څومره ماشومان د افغان امنيتي ځواکونو په ليکو کې دندې ترسره کوي.
دغه راز د پکتيکا والي الياس وحدت وويل چې د يوې مياشتې په موده کې به ټول هغه کسان د امنيتي ځواکونو له ليکو و ايستل شي چې قانوني عمرونه يې نه دي پوره کړي.
ده ووي: ((زه به هغو کسانو ته هم سخته سزا ورکړم چې دغه ماشومان يې د امنيتي ځواکونو په ليکو کې جذب کړي دي.))
د پکتيکا د مرکز ښرنې اوسېدونکي نجيب الله پژواک ته وويل چې د بې کارۍ او بېوزلۍ له امله خلک اړ شوي چې خپل ماشومان د ملي ځواکونو په ليکو کې شامل کړي.
د هغه په وينا، د پکتيکا په بېلابېلو سيمو کې د ملي ځواکونو او په ځانګړې ډول د سيمه ييزو پوليسو په ليکو کې ماشومان ليدل کيږي.
دا په داسې حال کې ده چې د يادې ستونزې تر څنګ په افغانستان کې ماشومان د جنسي تېري، تښتونې او قاچاق له ګواښونو سره هم مخ دي.
login or register a new account.
