مزارشريف (پژواک، ۱۵ تله ۹۵): د بلخ ولايت د مرکز مزارشريف ښار د واټونو پر ځينو دېوالونو د هنر د نړيوالې ورځې په وياړ انځورونه وکښل شول.
د تلې په ۱۵مه، د سپيدې فرهنګي مرکز لخوا د کابل- مزارشريف پر لويه لار د شمال زون د تفحصاتو پر دېوال د لسګونو نندارچيانو پر وړاندې انځور وکښل شول.
د انځورګرۍ دغه ننداره، چې د ((درنګ درنګ)) په نامه نومول شوې، د انځورونو طرحې يې د سولې په پلوۍ او د جګړې پر ضد وې.
د سپېدې فرهنګی مرکز مسوولې حفيظې محمدي پژواک خبري اژانس ته وويل، چې دغه چاره يې په بلخ کې د انځورګرۍ د هنر د بډاينې لپاره ترسره کړه.
نوموړې زياته کړه، چې انځورګرۍ ته يې ځکه د سولې په پلوۍ او د جګړې ضد طرحې ټاکلي، چې د افغانانو لپاره سوليز او ورورګلوۍ پيغام ولري.
هغه خوشاله وه، چې د انځورونو د جوړېدو پر مهال يې د مزارشريف ښار اوسېدونکو تود هرکلی وکړ.
د مزارشريف ښار د مدني ټولنې غړي سيد عالم، چې له جوړو شويو انځورونو يې ننداره کوله، پژواک ته وويل، چې ورته چارې په عامو خلکو کې د مثبت فکري بدلون لپاره لاره هواروي.
نوموړي زياته کړه، چې د نورو ډېرو ګټو تر څنګ ورسره د ښار ښکلا زياتېږي او خلکو ته خوشالۍ احساس ورکوي.
د بلخ د اطلاعات او فرهنګ ريس صالح محمد خليق ورته چارې په بلخ کې د هنر او فرهنګ د بډاينې لارې وګڼلې.
نوموړي زياته کړه، چې که څه هم په بلخ ولايت کې د انځورګرۍ هنر معتبر شاليد لري؛ خو د ښار پر واټونو د انځورو کښلو تجربه پکې نوې ده.
login or register a new account.
