زابل کې وسله والو او امنیتي سرتېرو ته مرګ ژوبله اوښتې ده

کلات (پژواک، ١٨ لړم ٩٥): چارواکي وايي چې په زابل ولايت کې د يوې نښتې په ترڅ کې وسله والو مخالفينو او د ملي اردو سرتېرو ته مرګ ژوبله اوښتې ده.

د زابل د والي وياند ګل اسلام سيال د لړم په ١٨مه پژواک خبري اژانس ته وويل چې تېره شپه لسګونو ولسوالو د مېزانې ولسوالۍ پر بېلابېلو امنيتي پوستو بريدونه کړي دي.

هغه زياته کړه چې وسله وال د ملي اردو له ځوابي بريدونو او کلک مقاومت سره مخ شول او په سيمه کې درې ساعته جګړه وشوه.

د سيال په وينا، په دې جګړه کې درې وسله وال مخالفين وژل شوي او او درې نور ټپيان شوي دي.

د والي وياند دغه راز وويل چې په نښته کې د ملي اردو دوه سرتېري ټپيان شوي، خو يوې بلې امنيتي سرچينې ويلي چې په جګړه کې يو سرتېرى وژل شوى او درې نور ژوبل دي.

وسله والو طالبانو په دې اړه څه نه دي ويلي، خو په شاه جوى، سيوري او شهر صفا ولسواليو کې يې د بريدونو پر مهال د دولتي سرتېرو د مرګ ژوبلې خبر ورکړى دى.