کابل (پژواک، ١١ مرغومى ٩٥): د اروپايي هېواد سوېډن يوې محکمې پنځه افغانان پر يوه بل افغان ماشوم د جنسي تېري په جرم محکوم کړي دي.
غربي رسنيو د مرغومي په ١١مه، خبر ورکړى چې دغه پرېکړه پرون د سوېډن د مرکز سټاکهولم شمال لوري ته د اوپسالا ښار محکمې لخوا شوې ده.
سرچينې زياته کړې، د محکمې قاضي د څارنوال هغه غوښتنه رد کړه چې ګوندې دغه پنځه افغانان چې عمرونه يې تر ١٨ کلونو کم ښودل شوي، د بند مودې له بشپړولو وروسته خپل هېواد ته ستانه کړل شي.
يادې محکمې پر يوه افغان ماشوم د جنسي تېري په جرم له يادو پنځو افغانانوڅخه يې څلورو ته د يو کال او درېيو مياشتو بند او پنځم افغان ته چې ١٦ کلن ښودل شوى، د ١٣ مياشتني بند سزا ورکړل شوې ده.
سرچينې زياته کړې، ياد پنځه افغان زلميان او د جنسي تېري ښکار شوى ماشوم بې سرپرسته دى او په سوېډن کې يې د پناه غوښتلو عريضې وړاندې کړې ده.
محکمې ويلي چې يادو کسانو د روان زېـږديز کال د اکتوبر په مياشت کې د اوپسالا په ښار کې پر يو افغان ماشوم چې عمر يې تر ١٥ کلونو ښودل شوى، د چاقو په زور جنسي تېرى کړى و.
دغه راز دغې محکمې يادو پنځو کسانو ته امر کړى چې د پېښې قرباني هلک ته ٢٧٦٠٠ ډالره جريمه ورکړي.
د يادونې ده چې تر دې مخکې هم په جرمني کې پر يو افغان تور پورې شوى و چې پر يوې المانۍ پېغلې تر جنسي تېري وروسته يې هغه وژلې وه.
login or register a new account.
