محمود راقي (پژواک، ١٤ مرغومى ٩٥): د کاپیسا امنیتي چارواکي وايي چې د ماين چاودنې په دغه ولايت کې یو پخوانی جهادي قوماندان وژلى دى.
د کاپيسا د امنيې قوماندانۍ وياند محمدايوب يوسفزي د مرغومي په ١٤مه پژواک خبري اژانس ته وويل چې دا پېښه پرون مازديګر د نجراب ولسوالۍ د غوث په دره کې رامنځته شوې ده.
هغه زياته کړه چې د فتح الله په نوم يو پخوانی قوماندان په خپل موټر کې چېرته پر لاره و چې د يادې درې د غچولان په سيمه کې پرې چاودنه وشوه چې له امله يې نوموړى ووژل شو او يو بل ملګرى يې ټپي شوى دى.
يوسفزي دغه کار د وسله والو مخالفينو وباله او زياته يې کړه چې په اړه يې پلټنې پيل شوې دي.
خو د امنيې قوماندانۍ وياند دا ونه ويل چې قوماندان فتح الله له کوم ګوند سره تړاو درلود.
د محمود په نوم د نجراب ولسوالۍ يو اوسېدونکى وايي چې فتح الله په سيمه کې يو مخور جهادي قوماندان و او د امنيت په ساتلو کې يې مهم رول لوباوه.
د نوموړي په وينا، د هغه په وژل کېدو سره به سيمه نا امنه شي.
محمود وايي چې نوموړى پخوا د حزب اسلامي له ډلې سره تړاو درلود.
د امنيې قوماندانۍ وياند محمدايوب يوسفزي دغه راز وويل چې نن سهار د دغه ولايت په تګاب ولسوالۍ کې د ګډو امنيتي ځواکونو له خوا د وسله والو مخالفينو پر ضد څلور ورځني چاڼيز پيل شوي دي.
هغه زياته کړه چې د امنيه قوماندان په مشرۍ د پيل شوو دغو عملياتو پر مهال نن سهار د خوشحال خېلو په سيمه کې جګړه پيل شوې ده او اوس هم روانه ده.
وسله والو مخالفينو تر اوسه د يادو پېښو په اړه څه نه دي ويلي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن