تخار کې د ترافیکي پېښې له امله دوه کسان مړه شوي

تالقان (پژواک، ١٦ مرغومى ٩٥): د تخار په فرخار ولسوالۍ کې د ترافيکي پېښې له امله دوه کسان مړه شوي دي.

د تخار ولايت د ترافيکو مدير حضرت ګل فرخاري د مرغومي په ١٦مه پژواک خبري اژانس ته وويل چې نن سهار شاوخوا پنځه بجې په فرخار ولسوالۍ کې ترافيکي پېښه رامنځته شوې ده.

هغه وايي: ((يو ٤٠٤ موټر له بدخشان څخه کابل ته پر لاره و چې په فرخار ولسوالۍ  کې يې يوه ريکشا وهلې ده.))

د هغه په وينا، په دې پېښه کې د ريکشا چلوونکی او يو بل کس وژل شوي خو د ٤٠٤ موټر چلوونکي تښتېدلى دى.

فرخاري وايي چې پېښه د ٤٠٤ موټر د چټک تګ له امله رامنځته شوې او پوليسو د تښتېدلي موټر چلوونکي د نيولو هڅې پيل کړې دي.

د تالقانو اوسېدونکي شاهرخ پژواک ته وويل چې دغه موټر لومړی له یوې ريکشې سره ټکر وکړ او بیا له ونو سره ولګېد او وروسته یې یو شمېر هټۍ هم زیانمنې کړې.

هغه وايي: ((دغه موټر چې کله تخار ته ورسېږي، سرعت يې ډېر زيات وي او بې ځايه هارنونه هم کوي، خلک يې ډېر په تکليف کې کړي دي.))

دا په داسې حال کې ده چې تر دې وړاندې هم په تخار ولايت کې ورته ترافيکي پېښې رامنځته شوي او اوسېدونکو يې څو ځلې د موټرو د چټک تګ له امله شکايتونه هم کړي دي.