په لغمان کې ناپېژانده کسانو د يوې کورنۍ لس تنه وژلي دي

مهترلام(پژواک، ۲ کب ۹۵): چارواکي وايي، ناپېژاندو وسله والو  د لغمان ولايت په بادپښ ولسوالۍ کې  د ښځو او ماشومانو په ګډون د يوې کورنۍ لس غړي وژلي او څلور نور يې ټپيان کړي دي.

د لغمان د والي وياند سرحدي ځواک پژواک خبري اژانس ته وويل چې ياده پېښه تېره شپه ۷:۳۰ بجې د يادې ولسوالۍ د مروت کڅ په سيمه کې رامنځته شوې ده.  

د ده په وينا،ناپېژانده وسله والو ياد کور ته لاسي بمونه ورغوځولي او دغو کسانو ته يې مرګ ژوبله اړولې ده.

دی وايي، د لغمان والي د ولسوالۍ چارواکو ته سپارښتنه کړې چې پېښه وڅېړي او د ولايت مقام ته معلومات ورکړي.

د سيمې يو تن اوسېدونکى چې وژل شوي او ټپيان يې د تره د زوى د کورنۍ غړي دي، وايي چې دغې کورنۍ له هېچا سره دښمني نه لرله  او د پېښې ټپيان د ننګرهار ولايت روغتون ته لېږدول شوي دي.

خو يوې بلې سرچينې پژواک ته وويل چې په دې پېښه کې د دې کورنۍ ۱۷ غړي وژل شوي او يو شمېر نور ټپيان دي.

سرچينه زياتوي چې د دې کورنۍ يو غړى پخوا د پوځي امبولانس چلوونکى و او څو ځله وسله والو ګواښلی و.

د سرچېنې په وينا، ياد کس اوس دغه ډريوري پرېښې وه.

د دغه  بريد مسووليت تراوسه چا نه دی منلی.