د پکتيکا د درې ولسواليو اوسېدونکي له ناامنيو او د خوراکي توکو له کمښت سره مخ دي

ښرنه(پژواک،١٩کب٩٥): د پکتيکا د درېيو ولسواليو اوسېدونکي وايي چې د امنيتي ستونزو ترڅنګ دخوراکي توکو له کمښت سره مخ دي که په وخت مرستې ورسره ونه شي، نو دغه ولسوالۍ به د دولت وسله والو مخالفينو په لاس سقوط وکړي.

په دې ولسواليو کې وړممۍ، تروې او وازېخوا شاملې دي.

د وازېخوا ولسوالۍ قومي مشر مولوي عبدالحي د کب په١٩مه پژواک خبري اژانس ته وويل چې د وسله والو طالبانو له لوري د وازېخوا، تروې او وړممۍ ولسواليو لويې لارې د ګواشتې په سيمه کې  له مرکز ښرنې سره تړل شوې دي.

ده وويل : (( ددې ولسواليو ټول اوسېدونکي نارينه او ښځې د امنيت په ټينګښت کې له حکومت سره پوره مرستې کوي.))

خو دغه قومي مشر وايي چې په دې وروستيو کې دغه ولسوالۍ  له امنيتي ستونزو او د خوراکي توکو له کمښت سره مخ دي.

دغه راز د وړممۍ ولسوالۍ قومي مشر حاجي ګل داد پژواک ته وويل چې په تېرو ١٤ کلونو کې د وخت چارواکو دې ولسوالۍ ته سفر نه دى کړى.

هغه وويل: (( په تېرو ١٤کلونو کې د امنيت د ټينګښټ لپاره موږ سلګونه کسان شهيدان ورکړي دي خو تر اوسه يو کوچنى د رغونې کار هم نه دى شوى.))

ده زياته کړه چې څو ځلې والي او امنيه قوماندان ورسره د ګواشتې په سيمه کې ددې ولسوالۍ د لارې د خلاصون په موخه ژمنې کړي خو تر اوسه نه دي عملي کړي.

ده هم وويل چې د دې ولسوالۍ اوسېدونکي د خوراکي توکو په برخه کې بېړنۍ مرستې ته اړتيا لري.

دغه راز د تروې ولسوالۍ قومي مشر عبدالصمد پژواک ته وويل، که دولت غواړي يادې درې واړه ولسوالۍ وساتي، نو د ګواشتې لاره دې خلاصه کړي او هغوی ته دې خوراکي او غيري خوراکي توکي ورسوي.

هغه وايې، په يادو ولسواليو کې د خوراکي توکو بيې لوړې شوي چې  هره کورنۍ يې د اخيستلو توان نه لري.

د وزاېخوا د سيمه ييزو پوليسو مشر عبدالشکور پژواک ته وويل چې د دې ولسوالۍ د امنيت د  ټينګښت په موخه يې د کورنۍ ٣٥ غړي تر اوسه وژل شوي دي.

login or register a new account.