د کاپیسا په اله سای کې د نجونو تړلي درې ښوونځي بېرته پرانیستل شول

محمودراقي (پژواک، ٦ ورى ٩٦): د کاپيسا ولايت په اله ساى ولسوالۍ کې د نجونو درې ښوونځي چې د وسله والو مخالفينو له لوري تړل شوي وو، بېرته فعال شوي دي.

د اله سای ولسوال غلام نقشبند ساپي د وري په ٦مه پژواک خبري اژانس ته وويل چې دغه ښوونځي تېر کال د وسله والو مخالفينو د ګواښونو له امله تړل شوي وو.

هغه زياته کړه چې دغه ښوونځي د نوي ښوونيز کال له پيلېدو سره سم د سيمې د قومي مشرانو او سپين ږيرو د هلو ځلو په پايله کې بېرته پرانيستل شول.

ولسوال وايي چې په دې ولسوالۍ کې لېسه نشته، همدا درې د نجونو ښوونځي دي خو ځينو کسانو غوښتل چې په دې ولسوالۍ کې هم ښوونځي د تګاب ولسوالۍ په څېر تړلي پاتې شي.

د  اله سای ولسوالۍ  د اسکين سيمې اوسېدونکى ملک جان وايي، ښوونځي پرانيستل شول، خو ودانۍ نه لري.

د هغه په وينا، د دوى د کلي د ښوونځي احاطه تېر کال خلکو په خپل لګښت جوړه کړې وه، خو ودانۍ نه لري.

ملک جان پژواک اژانس ته وويل چې حکومت دې د ښوونځيو د امنيت نيولو تر څنګ د هغو د ودانيو غم هم وخوري.

د کاپيسا د پوهنې رييس محمد نسيم ساپی  وايي  چې په اله سای ولسوالۍ کې  د ولسوالۍ د اوسېدونکو په همکارۍ د نجونو ښوونځي بېرته پرانيستل شوي دي.

هغه زياته کړه چې د نظارت ډله په اله ساى کې له ښوونځيو څارنه کوي.

نوموړي وويل چې هر کال له بوديجې سره سم په يو شمېر سيمو کې ښوونځيو ته ودانۍ جوړوي.